Corte a tuma un decision diahuebs ultimo na fabor di FMSA, relaciona cu un disputa tecnico entre e doño di e stacion di gasolin den caya grandi, esta FMSA y e huurdo di e stacion di gasolin, esta GERMO Services, cu Mariela vd Bosch como Director. E ultimo a hiba FMSA dilanti Corte cu un peticion pa Hues obliga FMSA pa haci trabou di mantencion y reparacion urgente na e tanki unda ta warda combustibel. E urgencia ta debi cu e tanki ta peligroso pa bida di hende. Hues a evalua e ponencianan, a analisa conseho di Dienst Technische Inspectie (DTI) y na final a duna FMSA rason.
E compania GERMO Services NV cu ta opera e pomp di combustibel CITGO Caya Grandi, representa pa abogado mr. Suzy Kock, a entama un caso sumario (kortgeding) contra Fuels Marketing & Supply Aruba (FMSA), kende a conta cu abogado mr. Maldonado como nan consehero legal. Hues mr. S. Verheijen a dicta sentencia diahuebs dia 20 di december ultimo.
Den e caso, partidonan a purba tur forma pa haya Hues na nan banda, relaciona cu interpretacion di un forma nobo di traha y procesonan tecnico relaciona cu almacena combustibel (gasolin-diesel-kerosin) y forma di bende cu publico. Debi na aspectonan tecnico, a opta pa cambia e procedura.
DTI a garantisa cu e procedura nobo cu ta aplicando ta cumpli cu normanan tecnico aceptabel. E hecho cu a aplica e mesun proceduranan aki pa varios luna caba, ta kita e aspecto di urgencia den cual a entama un caso sumario. Hues a haya cu e demanda di GERMO no ta valido debi cu no tin urgencia mas pa tuma un decision mesora riba un procedura tecnico tumando luga pa lunanan caba.
Hecho ta cu e discusion mes ta cu FMSA y GERMO ta den discusion pa bende e stacion di gasolin na famia Van den Bosch-Arends. E tabata di nan pa hopi aña pero cu tempo a bende cu VMSA cu despues a bira FMSA. Nan a cera un contract na 2013 pa 5 aña largo, cu a vence e aña aki. Di eynan a alarga e contract cu 1 aña mas, pues lo vence na maart 2019.
Den pleno negociacion di prijs di benta, ta purbando pa FMSA inverti un suma cuantioso pa drecha e tanki pa garantisa bon suministro pa hopi aña mas. Di otro banda, FMSA ta tene cuenta cu si e ta bende e pomp, cu lo bende “as is where is” pues ta sigui haci trabounan minimo pero no inversionnan grandi mas. Parce cu tin mas partido interesa den cumpra e stacion.
Cu e sentencia aki awor, partidonan lo mester bay bek mesa di negociacion y yega na un acuerdo husto pa ambos. E decision di Corte a kita e expectativa di haci inversion pa despues bende e pompstation.
Loading…
Reload document 
Open in new tab 
