E famoso specialista medico local Tim Peterson eroneamente su nomber ta inclui riba lista di pashentnan positivo cu ta circula desde dialuna ultimo. Un eror cu e specialista ta bisa ta atacha su bon nomber, reputacion y di su oficina. Motibo pa cual el a entrega un keho pa violacion di secrecia di pashent pero tambe pa e hecho cu incorectamente a pone su nomber riba e lista positivo.
Den e mesun carta di denuncia aki manda pa Inspector General, Inspector di Salubridad Publico y Departamento di Salubridad Publico, e specialista medico ta trece na bista e forma “slordig” di e seccion na aeropuerto cu ta encarga cu test di esnan cu ta yega Aruba.
Dia 23 di augustus, e ta bisa den e carta, el a tuma nota di un lista di pashentnan positivo pa COVID-19 cu ta circula. “Pa mi sorpresa, y di forma incorecto / inhusto, mi nomber ta aparece riba e lista, aunke cu un fecha di nacemento robes. Esaki ta trece consecuencianan funesto pa mi mes, mi pashentnan, mi personal y otronan,” Peterson ta bisa den su carta di denuncia.
Loading…
Reload document
Open in new tab E ta splica den detaye con tur cos a cuminsa, cual tabata na su yegada na Aruba despues di a pasa un luna cu su famia na Hulanda. Asina tambe el a experencia di cerca e forma incorecto cu ta atende cu hendenan cu yega di exterior y cu mester haci un test.
Peterson ta bisa cu e ta un cirujano respeta cu un trayectorio di 25 aña di servicio medicinal na Aruba, pa cual e ta sinti su mes obliga pa entrega un denuncia na e instancianan menciona. Loke a pasa ta un violacion inhusto di su privacidad y violacion di secrecia medico. Banda di esaki, e ta bisa, na su opinion no mester a traha e lista aki mes sin reglanan estricto pa siguransa di secrecia.
Ora cu el a yega Aruba cu su famia, a haci e test na aeropuerto. “E situacion ey tabata “rommelig” na momento di haci e test,” el a conta. Despues el a ricibi unicamente un email cu ta bisa cu e resultado ta conoci, y cu hopi lihe lo tuma contacto cu ne y a pidie pa bay den isolacion. “Di e ultimo aki mi a conclui cu probablemente mi a test positivo. Pero nunca mi a haya mi resultado y nan no a ni yamami.”
Eynan caba dr. Peterson a cuminsa sinti duda y mirando cu e mester cuminsa traha, den 15 ora di tempo el a haci testnan na Laboratorio di Servicio y na LABHOH (hospital). Ambos test a sali negativo.
E no por pensa otro cu na aeropuerto a bruha den e pruebanan y a logra haya permiso pa cuminsa traha.
Awo loke e no ta compronde, di con DVG no a kita su nomber for di e lista di pashentnan positivo. “Door di no haci esaki, nan a perhudicami. Mi nomber inhustamente ta aparece riba e lista, y ora cu e lista aki a leak el a trece consecuencianan negativo pa mi reputacion. Despues di 11 di augustus mi a tene consulta y tabata den contaco cu mi pashentnan, personal y otronan. Nan por acusami di comportacion iresponsabel. E confiansa den mi persona como un ciruhano, cu mi a traha pa logra ultimo añanan, di repenta a haya un sola duro.”
Na momento cu e lista aki a cuminsa circula, e ta splica, tur esnan cu e tabata den contacto cu nan a keda preocupa, inhustamente. “Nunca mi lo pone mi personal, pashentnan of otronan na peligro,” e ta bisa.
Analisando tur loke el a pasa aden, e no tin palabra bunita pa e forma con DVG ta atende cu datonan priva di pashentnan, claramente violacion di secrecia medico. E leakmento di e lista aki ta inaceptabel, y su nomber cu ta aparece inhustamente riba esaki tambe ta causa daño enorme na dje.
Pa e motibonan ariba menciona, e ta entrega un klacht contra leakmento di e informacion, e hecho cu su nomber inhustamente ta aparece riba e lista. E ta haci un apelacion fuerte na e autoridadnan concerni pa haci e investigacionnan necesario ya cu e kier ricibi e resultadonan mas pronto posibel.
Pero tambe e ta pidi pa publica den un medio local cu e nomber di Tim Peterson inhustamente ta aparece riba e lista cu a leak, pa tur hendenan cu e tabatin contacto cu nan por ta trankil. Ta exigi un disculpa tambe.
