En conexion cu Dia di Tata, Chubato Beer World a tene dos dia di actividad pa celebra e dia aki hunto cu e tatanan. E celebracion a tuma luga riba Plaza Nikky Habibe.
Frank Tieleman, Operador di Chubato Beer World, a cuminsa na bisa cu nan ta sumamente satisfecho cu e acogida di nan actividadnan di fin di siman. Diabierna nan a habri cu Noush Jeandor y e ambiente a ranca sali pa 10:00 pm.
Diasabra desde 10:00 am te cu 4:00 pm tabatin exhibicion di auto electrico cu solar panel y esaki tabata den cooperacion cu RBC Bank. E evento aki a tuma luga riba Plaza Nikki Habibe. Aki tambe e publico a responde hopi bon. Ya caba ta pensa pa siguiente biaha nan envolve mas negoshi pa haci e evento mas grandi.
E ambiente a sigui anochi, caminda cu e bikernan a cera e dia y e banda di rock, Fearless a crea ambiente. Tambe tabata tin wega di cerbes.
Pa loke ta e iniciativa di haci uzo di e plaza, Tieleman a bisa cu e ta kere cu a traha e plasanan den Caya Grandi c’un proposito. Y un di e propositonan ta pa tene eventonan di entretenimento y di e manera aki envolve e pueblo tambe. Vooral awo cu e situacion den cual caya grandi ta aworaki. Idea ta pa trece e pueblo bek pa den caya.
Tin hopi idea con pa trece bida bek den centro di ciudad, pero e ta sinti cu mas bien falta di mas iniciativa. Haci uzo di centro di ciudad, haci uzo di e plasanan den caya, door di organisa mas evenemento, naturalmente cu tur e permisonan na ordo y di e manera aki purba na trece bida den caya grandi y di e manera aki tambe ta contribui cu e comerciantenan.
Chubato Beer World semper ta purba di bin cu ideanan nobo den entretenimento. Hopi biaha e eventonan aki no tin di haber cu Chubato Beer World, pero ta un manera di trece ambiente y entretenimento den centro di ciudad, creando un fluho di hende den centro.
No ta tur ora e evento ta tuma luga riba Plaza Nikky Habibe, pero por ehempel otro siman, paden na Chubato Beer World nan lo tin karaoke. Dus tur fin di siman tin algun evento.
E fin di siman aki tabata uno exitoso, pa cual nan ta pensando caba pa bin cu mas eventonan asina, haciendo uzo di e plasa como un area di concierto y esaki tambe ta trece mas bida tambe den caya. Tur comercio den e area aki ta beneficia di e eventonan aki.
Frank Tieleman, Operador di Chubato Beer World, a inidica cu semper nan tin prijs special riba e bucketnan di cerbes. El a extende un invitacion na henter pueblo di Aruba pa asina bin den caya, bin aporta na e negoshinan aki y pa asina por mantene bida tambe den nos centro di ciudad.
