Proximamente e scol secundario John Wesley College lo cera su portanan proximamente, riba decision di Stichting Protestant Christelijk Onderwijs Aruba (SPCOA).
Pa algun luna caba hopi a wordo papia pa asina por yega na un solucion pa e situacion dificil aki. Chris James, ex-alumno di John Wesley College MAVO den su entrevista den e noticiero ENFOKE a indica cu ainda nan tin fe cu e scol lo keda habri. Pa esaki nan lo tene un evento di cendemento di bela, unda cu diferente alumno- y ex-alumnonan, maestro- y ex-maestronan lo t’ey presente pa nan duna nan preocupacion pa e ciere di John Wesley College.
SAN NICOLAS
James a sigui bisa cu ta parce cu Gobierno mes no tin interes pa busca solucion pa John Wesley. Pa Gobierno, San Nicolas a bira un ‘Forgotten City’. Pocopoco a cuminsa manda e maestronan bay traha na Mon Plaisir: un dia nan ta na Mon Plaisir College MAVO y un otro dia nan ta na John Wesley College.
Tin algo ta pasando na San Nicolas. Ta puntra si e situacion aki tabata pasando na otro scol, den un otro districto, si tambe Gobierno lo no haci nada. Tambe nan a tende di e rumornan cu lo cera St. Augustinus College MAVO tambe. Si acepta cu ta cera un scol, e dia di mañan nan lo cera un otro scol masha facil tambe.
Den weekend ultimo el a pasa parti flyer den San Nicolas y e tabata den compania di varios politico di partido AVP. Pero James a reitera cu e accion aki no tin di haber cu politica, pero e causa ta pa mantene John Wesley College habri.
