Faltando dos dia prome cu entrega e lista oficial di partido AVP na Conseho Electoral, tur cos ta mustra cu un di e candidatonan mas prominente di partido lo no sigui den politica y como tal lo no aparece mas riba e lista color berde. Parlamentario mr. drs. Richard Arends ta ausente di actividadnan politico pa algun dia caba, hasta awe ora cu AVP tabata hunto dilanti edificio di parlamento protestando contra e sistema nobo di eleccion. Fuentenan a sigura cu te na e momentonan aki, Arends no ta interesa pa sigui y cu e lo a informa Mike Eman caba di su decision.
Parlamentario mr. drs. Richard Arends di 41 aña di edad, a studia como administrado publico na Universidad di Leiden y despues den “Public International and European Law” na Universidad di Amsterdam. Prome cu el a bira parlamentario, e tabata Minister di Asuntonan Economico y Comunicacion. Prome cu esey e tabata e consehero principal di Minister Presidente Mike Eman. A subi lista di AVP na aña 2017 y den su salida a logra 1390 voto riba su nomber. E ta papia Ingles, Spaño, Hulandes, Frances y Papiamento. E ta casa y tin tres yiu muhe.
“E ultimo palabra no ta bisa ainda”, asina un fuente yega na e proceso a indica na nos un rato pasa. Ainda tin un chens chikito cu lo por cambia di opinion, mara na circunstancianan. A puntra si esaki por ta debi na number of posibel funcion den partido of gobierno, pero e fuente no a divulga. “Ta mas bien un decision personal cu Arends lo a expresa di algun luna pasa caba”.
Ta menciona cu Richard Arends lo ta mas interesa pa sigui un carera den sector priva en bes di keda den politica. E lo a bisa su hendenan cu el a entrega suficiente tempo caba di su bida y carera na politica, pero cu awor ta tempo pa sigui crece den su carera profesional.
Di experiencia nos por bisa cu tanten cu Mike Eman no entrega e lista diabierna awo pa 3:30 pm na Conseho Electoral, ningun candidato ni number no ta sigur. Keto bay por bin cambio, sea di candidatonan cu lo keda afo, otronan cu lo drenta aden na ultimo momento y hasta cambio di number sea a subi of baha riba e lista. Awor aki caba ta scuchando yen di number pa candidatonan pero tur ta speculacion, pendiente entrega di e lista oficial cu ta esun cu AVP lo bay eleccion cu ne dia 25 di juni 2021.
