E tabata tres dia di evento unico. Tres dia durante cual invitado- y huespednan di Aruba Marriott Resort & Stellaris Casino a disfruta di e delicianan presenta pa chef François Geurds.
Gerencia por medio di General Manager di e compleho, Raoul Lemmerling, tabata anfitrion tambe diabierna di un grupo di prensa cu por a disfruta di e delicianan aki. Sinta riba beach na e restaurant ATARDI di Aruba Marriott, tabata e ambiente perfecto di disfruta di algo otro riba tereno culinario, compaña pa un bunita bahada di solo.
Tur tres dia di e evento tabata soldout y a keda cu lista di espera. Y no ta pornada, pasobra e experiencia di e talentonan di François Geurds no ta algo cu ta experiencia tur dia. Chef Francois, di raiznan di San Nicolas for di unda su mama ta procedente, ta conta cu el a cera conoci cu e sabornan local di recetanan cu el a haya for di su mama. Di e forma aki a trece un combinacion local e internacional durante e tres dianan organisa pa Marriott.
“Aruba tin mi profundo respet como cu mi mama a nace riba e isla aki y a comparti su raiz y recetanan cu mi ta uza durante e eventonan aki.”
El a haci combinacion di diferente receta local manera carni stoba den un bachi diferente, y igualmente sopi oester. E ultimo aki tin un presentacion engañoso pa na final cer’e cu un expresion di waw. Na momento cu a purba e sopi, diferente invitado a pone un cara di sorpresa. “E ta mucho salo” a cuminsa comenta poco-poco. A yega despues e mescla di e sopi cu tabata e ostra mes combina cu chuculati blanco. E combinacion di salo y dushi a trece e balansa perfecto den e sabor di sopi oester pa finalisa cu un “ah esaki si ta perfecto”.
Pakico chef François Geurds t’asina admira? E ta poseedor di e famoso reconocimento internacional riba tereno culinario, esta e Michelin Star. François Geurds (Eindhoven, 1975) ta doño di e restaurant di dos strea FG Restaurant y tambe di FG Food Labs na Rotterdam.
Durante e 6-course dinner y wine pairing chef François a uni cu cinco chef local pa presenta e delicianan pa paladar na e huespednan.
Bunita gesto tambe tabata e hecho cu a traha cu seis di e miho studiantenan di EPI y dos di nan lo haya e honor di core stage na e restaurantnan di dje na Rotterdam. Esaki ta un experiencia unico.
E tres eventonan tabata e experencia diferente cu Marriott kier a ofrece su huesped y invitadonan. Y si abo a perde e chens, bo a perde un berdadero experencia unico.
