Den careda di 2or di marduga diasabra a sosode un accidente cu hopi daño material na ambos auto. Polis a wordo manda den Professor Lorentzstraat pa un accidente hit and run.
Na yegada a topa cu e auto Toyota A-773 para kibra mey mey di caminda. E chauffeur tabata keha di dolornan na pia. Polis a haya informacion cu un pickup A-54271 ta e auto cu e ocasiona e accidente. Polis a tende cu e pickup ta para den Socotorolaan riba e skina na e crusada. Na yegada Polis a haya e auto para. A haya informacion cu e chauffeur a drenta un apartamento un tiki mas pabou.
Polis a bay bati na e porta y e chauffeur a sali pero hopi bebi. E tabata lomba sunu y cla pa subi cama. Polis a papia cune y despues di algun pregunta, el a splica Polis cu e mes tabata cu e auto. Polis a pone supla y e machine a marca 4x mas di e limite cu mag.
A detene mesora y dogcatcher a bin buske hibe warda. E chauffeur aki ta conoci di Polis caba. E no tin rijbewijs y ta naci na Ecuador pero legalmente trahando na Aruba. Algun siman pasa el a keda deteni caba haciendo maniobranan riba caminda treciendo trafico den peliger. Awor un biaha mas ta subi caminda cu auto y ocasiona desgracia.
E pickup ta registra riba un hende biba na Parkietenbos. Despues di e detencion a bay bek na e sitio di e accidente. Eynan a papia cu e chauffeur di e otro auto. A tuma su declaracion y Forensys tambe a bin dune un man. E auto Yaris A-773 a keda hopi kibra y tur cos ta mustra cu e hoben chauffeur mes mester bay drecha e auto.
