Centro di Bario Savaneta ta ofrece diferente actividad durante aña pa grandi y chikito. Diasabra, 24 di juni proximo, Centro di Bario Savaneta ta celebra Dera Gay en grande cu diferente entretenimento pa deleita e publico presente.
E actividad di Dera Gay ta di 6:00 pm pa 10:00 pm, cuminsando cu entretenimento pa Tipico Pegasaya, sigui pa Grupo di Baile Masiduri, Grupo Nos Cultura y Ivy y su Grupo. Bar y cushina lo ta bon surti. Entrada ta completamente gratis.
Durante e evento tambe lo tin competencia di baile di Dera Gay den categoria infantil, hubenil y adulto y premio pa miho trahedi Dera Gay. Pa participa na e competencia por inscribi na 594-4570.
Meta di e actividad aki ta pa promove nos cultura y tradicion como tambe recauda fondo pa por inverti den e mantencion di e edificio y veld deportivo na Centro di Bario Savaneta.
Un y tur ta cordialmente invita pa bin pasa un rato ameno den compania di famia y amistadnan. Like e pagina di Facebook di Centro di Bario Savaneta y keda al tanto di e diferente actividadnan cu Centro di Bario Savaneta ta ofrece na henter e comunidad di Aruba, en particular esunnan di e bario Savaneta y bisindario.
