Manera semper, Centro di Bario Playa Pabao durante aña ta hopi activo cu varios actividad. E biaha aki nan ta cla pa nan fiesta di disfras recicla.
Dennis Burke, presidente di Centro di Bario Playa Pabao, a comenta cu directiva di e centro a dicidi cu un biaha mas ta bay organisa e festival di disfras di material recicla.
A yega di organisa e festival aki den pasado caba, segun Burke, agregando cu lo partie den tres.
Tin e parti p’e muchanan di kleuter. E di dos grupo t’e muchanan di 1, 2 y 3de klas y e di tres grupo ta p’e muchanan di 4, 5 y 6de klas.
Ta calcula cu lo participa 15 participante. Esey t’e promedio cu a haya den e ultimo dos añanan cu a organis’e. Ta spera di haya esey, Burke a bisa. Tin oportunidad pa inscribi, cual ultimo dia lo ta diaranson, dia 8 di februari.
E actividad aki lo tuma luga diabierna, dia 10 di februari, cuminsando pa 6:00 pm te cu 8:00 pm. Lo cobra cinco florin pa persona pa por participa n’e actividad aki.
