Centro di Bario Lago Heights (CBLH) ta invita henter e comunidad di Aruba, en particular nos habitantenan di pariba, pa presencia e prome edicion di “Sweet Sunsets” cual lo tuma luga diabierna awo 29 di september di 7:00 pa 10:00 pm na CBLH.
“Sweet Sunsets” ta un fiesta di bario cu ta tuma luga tur fin di luna cu e meta pa brinda nos comunidad di pariba e oportunidad pa bini hunto y socialisa den un espacio sano, yena cu alegria y cu diferente cuminda, mini tayer, show y musica.
Pa trece tur persona den comunidad mas cerca di otro, CBLH lo invita tambe tur luna un of mas grupo/organisacion social como nos invitado special.
E programacion lo cuminsa cu e “opening act” di dos grupo di baile “Orguyo y Talento” y “No Image Dance Crew”. Siguientemente lo sigui entretenimento musical na encargo di Tipico TRAMUS y Mike’s Super Disco. Tambe lo tin presentacion/demostracion di programa di CBLH y tayer di salsa pa tur presente.
CLBH ta extende un invitacion grandi na henter pueblo pa join nos diabierna awo 29 di september di 7:00 pa 10:00 pm na Centro di Bario Lago Heights.
