Centro di Bario y Deporte Dakota, ta preparando un evento special pa Dia di Rey. Militza Gietel,secretaria di directiva, a splica cu ta bay tin dos actividad pareu.
Den e hal paden, hunto cu Union Tipico Arubiano, ta bay tin un fiesta tipico di bario di Dakota. Ta bay tin ocho banda cu lo presenta e dia aki. Pa asina deleita miembronan di e bario y tambe pueblo en General cu nan dushi musica tipico.
Parti pafo, riba e binnenplein, ta bay tin diferente stand di cuminda tipico di Aruba, pero tambe cu un toke di nos dushi Hulanda pa por celebra asina Dia di Rey.
Gietel a sigui conta cu ta bay tin tambe weganan tradicional pa e muchanan. Manera bulamento den saco, coremento cu webo den cuchara. Ta bay tin cosnan special pa e muchanan tambe.
Parti pafo cu ta bendemento di cuminda y e weganan, ta bay ta completamente gratis. Locual si ta bay tin un prijs chikito cu tin cu paga, ta si kier join e fiesta paden, pa balia e gruponan tipico. Pre benta ta 7,50 y na entrada ta bay ta 10 florin. Pa mas informacion riba e ticketnan, por subi nan pagina di Facebook of tambe cerca e miembronan di directiva y tambe cerca miembronan di Union Tipico Arubiano.
E evento parti pafo ta cuminsa pa 10’or di mainta y e ta caba pa 6’or di atardi. E parti di e bandanan tipico ta cuminsa pa 12’or di merdia y ta caba 6’or di atardi.
