CBS ta anuncia e publicacion di e di dos parti di e Atlas Social di Aruba traha a base di dato colecta durante di Censo 2020. E mapanan aki ta ilustra e diversidad social y demografico na Aruba y ta forma parti di un serie di publicacion nan cu lo ta disponibel den un formato digital.
E mapanan ta ilustra visualmente e indicadornan di distribucion social, economico y demografico di pais Aruba. Haciendo uzo di tecnologia nobo, pa prome biaha e Atlas Social ta disponibel den e formato digital y interactivo.
E datonan ta presenta como un storia y ta duna e usuario e oportunidad pa scoge e mapa cu e kier bishita di e lista di mapa cu ta parece na comienso di e Atlas Social.
Na cada mapa por lesa un descripcion cortico cu ta consisti di un texto corto y un grafico. Usuario por scoge tambe pa download e tabel- y graficonan cu ta pertenece na cada mapa.
E di dos grupo di mapanan cu CBS ta presenta ta e mapanan di poblacion cu ta trata e caracteristicanan general di nos poblacion manera:
- Poblacion segun tipo di hogar:
- Hogar nucleo
- Un hogar nucleo ta un hogar cu ta consisti di un solo famia.
- Hogar extendi y composita
- Un hogar extendi ta un hogar unda tin mas famia ta biba hunto unda tur miembro di hogar tin un relacion familiar cu otro.
- Un hogar composita ta un hogar unda tin mas famia ta biba hunto unda no tur miembro di hogar tin un relacion familiar cu otro.
- Hogar nucleo
- Hogar cu ta consisti di 1 persona
- Poblacion cu no a nace na Aruba
- Poblacion cu no a nace na Aruba y cu a bin biba na Aruba prome cu 1986
- Poblacion cu no a nace na Aruba y cu a bin biba na Aruba despues di 1986
- Personanan di 14 aña of mas cu ta casa
- Personanan di 14 aña of mas cu ta biba cu otro riba base duradero (no casa)
- Cantidad averahe di yiu pa hende muhe entre 14- 49 aña di edad
E mapanan di Aruba ta dividi den 55 zona y 8 region. Si un usuario kier haya mas informacion di un region of zona, e por click riba esaki y un “pop-up window” lo habri cu informacion tocante e zona of region scogi pa aña 2010 y 2020.
Aruba ta un isla chikito cu un superficie total di 180 km2 y cu un poblacion cu tabata consisti di 108,166 persona na 1 di october 2020 (durante e conteo di Censo 2020).
E mapanan ta mustra cu aunke Aruba ta un isla chikito den tamaño, tin diferencia entre zona y region pa locual ta trata caracteristicanan social y demografico di e poblacion.
Pa un planificacion regional efectivo y optimal ta importante pa por indica y ilustra e caracteristicanan di cada zona y cada region.
E link pa e Atlas Social ta:
E mapanan ta disponibel riba nos website www.cbs.aw y por wordo haya bou di e tab di ‘Census2020’.
CBS ta trata di publica dato pa nos poblacion den un manera mas atractivo pa lesa y compronde. CBS ta spera cu e publicacion aki lo yuda esnan encarga cu planificacion regional cu nan trabou y tambe provee e publico en general cu un mihor comprendemento di e desaroyonan regional na Aruba.
