Despues cu a elimina e ekipo di Britannia den e serie semi-final di Division di Honor contra di Deportivo Nacional, varios hungado y miembro di cuerpo tecnico a bay regla cuenta cu referee di e partido, haciendo uzo di lenguahe mahos y den algun caso hasta a uza forsa fisico y pa esaki nan mester paga un cuenta basta pisa!
Cuater futbolista bringado
Cuater miembro di e organisacion di Piedra Plat a ricibi castigo for di Comision di Castigo di AVB di cual tres ta hungado, kendenan ta Dillan Rodriguez, Jeffrey Rolston y Carlos Geerman y e director tecnico, Jose Luis Duran.
Britannia a keda sin keeper
Notabel den e caso aki ta e echo cu Britannia ta perde dos keeper pa un periodo basta largo, caminda esun cu a ricibi e castigo mas pisa den e incidente, ta e veterano Carlos Geerman. Comision di Castigo a impone, di acuerdo cu articulo 7, un castigo di 5 aña caminda e no ta permiti pa hunga pa ningun division di AVB!
Na mes momento tambe e keeper di reserva, e hoben Dillan Rodriguez kende apenas Britannia a caba di regla su permiso pa e por a hunga, a ricibi un castigo, di acuerdo cu articulo 6, cu e no por hunga futbol pa e siguiente 3 aña. Pues e lo por mira accion bek den campeonato 2026-2027.
A castiga tur cu a tira scop y mokete
E di tres hungado di Britannia cu a ricibi castigo ta e defensa central Jeffrey Rolston. El a haya menos castigo, ya cu segun comision di castigo, a aplica articulo 5 cu ta stipula cu pa 6 luna Rolston no por hunga den ningun division di AVB mientras cu e ta ricibi tambe un castigo di 1 aña condicional. Pues cualkier situacion cu e haya su mes aden caminda e lo a viola reglanan di conducta, Jeffrey Rolston lo ricibi un aña di castigo.
No por entrena ningun team ni yega veld mas
Pa loke ta entrenado Jose Luis Duran, su forma di procede despues di e wega di futbol tabata simplemente inaceptabel y pa e motibo aki Comision di Castigo a aplica articulo 38 Lid B di HHR y a impone un castigo di 1 aña caminda Duran no por dirigi ningun ekipo den division Hubenil, Damas, Division 1 y 2 y tampoco division di Honor. Tampoco ta permiti Jose Luis Duran pa ta presente riba tereno di wega den ningun capacidad.
Teniendo honor na su mes, Duran lo a entrega su retiro como entrenado na directiva di Britannia cu a acepta esaki tambe.
Comision di Castigo
Den AVB nan tin regla un Comision di Castigo, cu ta cinco miembro nombra door di e ekiponan miembro y afilia na e organisacion di futbol. E comision aki ta aplica e reglanan y leynan conoci pa tur hungado. E comision ta actua asina cu un referee traha un rapport y exigi castigo pa un hungado of entrenado. E miembronan di strafcommissie ta Marcelo Croes como presidente, Hyacintho (Sonny) Tromp, Ronny Christiaans y Marcel Carrion.
Ataca referee ta castigabel
E consecuencianan di agredi un referee durante un wega di futbol por varia for di expulsion for di e wega ey inmediatamente te na suspension pa tempo mas largo di tur wega oficial di futbol, dependiendo di e gravedad di e incidente. Mester respeta y proteha refereenan na tur momento, ya cu nan ta desempeña un papel crucial pa garantisa “fair play” y pa hungadonan respeta e reglanan di wega.
Castigonan na Aruba
E caso di e ekipo di SV Britannia awo no ta nada nobo. Aunke cada casa di agresion di referee ta condenabel y di mas, den pasado caba tabatin varios hungado cu a pasa door di investigacion y a haya castigo. Asina por menciona e caso di Brayen Wiersma cu a yega di haya 10 aña di castigo, Raimy Davelaar a haya 5 aña y Mauricio Escalona a haya un aña sin cu e por a hunga futbol.
Tocante AVB
A funda Arubaanse Voetbal Bond (AVB) na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur nos isla, incluyendo e muchanan, hoben, hende muhe y adultonan. Nan ta responsabel pa sanciona e torneonan di futbol organisa pa mayoria liga. E oficina di AVB ta situa den Compleho Deportivo Frans Figaroa na Noord. Randolf Lacle ta presidente, eligi pa mayoria
