Aña pasa, en conexion cu e prome consecuencianan di Covid-19 pa e bida cultural, Prins Bernhard Cultuurfonds Caribisch Gebied a introduci un fondo specifico pa alivia organisacionnan cultural y artistanan cu a sufri efectonan negativo di Covid-19 riba nan funcionamento y programanan planea caba. Asina tambe Cas di Cultura, Stichting Schouwburg Aruba, a logra haya un subsidio pa por realisa varios proyecto.
E fondo a percura pa 4 exposicion den sala di exposicion, esta di artistanan Mo Mohamed, Samuel Sarmiento, Cream of Wu y Sharina Gumbs y tambe a logra dos edicion di e proyecto Obra di Luna cu obranan di Adi Martis y Evelino Fingal for di e coleccion di Sticusa bou auspicio di Unoca. E ultimo a ser realisa tambe cu aporte di Unoca, curador Jimmy Yánez y Departamento di Cultura.
Aparte di programacion, e fondo a percura pa por cumpra material pa prepara e facilidad di Cas di Cultura pa ta “Covid-19 proof” y por ricibi publico responsabelmente. Por ultimo a adkiri material tecnico pa por realisa produccionnan ‘in-house’ pa e plataformanan online, pa por keda brinda programacion den temponan insigur, pero tambe continuamente expandiendo nos servicio.
Cas di Cultura ta hopi gradicido na Prins Bernhard Cultuurfonds Caribisch Gebied, cu pa medio fondo di Covid-19 special a logra duna aliento den un temporada cu basta reto y toch asina por a percura pa publico y artistanan por a keda frecuenta Cas di Cultura na un manera sigur y cu bon contenido.
