Diasabra mainta, den careda di 11:00 am, tanto polis como brandweer a bay cu urgencia pa un adres na Yucuri p’un cas na candela. Na prome instante no tabata mucho cla ainda con exacto e candela a origina.
A papia di un boter di gas na candela, supuestemente despues un brommer lo a pega candela y esaki a pone e cas na candela tambe. Polis a yega rapidamente na e sitio y di biaha a cuminsa evacua tur hende den e cas. A cera e area pa mantene tur hende na un distancia.
Polis a pone e dama cu tabata n’e cas sinta den patruya, mientras e bomberonan tabata paga e candela, y pa despues controla den e cas si tin mas cos na candela. Doño di cas a presenta pa mira e situacion. El a papia cu autoridad pa trata di haya sa kico tur por a bay robes. Ambulance tambe a presenta na sitio pa duna asistencia medico na esunnan cu tabata den cas cu a pega candela.
