Partido ReD ta defende libertad di prensa, esaki ta un principio sagrado. Nos ta apoya un prensa cu ta critico y independiente. Nos ta aplaudi ora prensa critica di un forma independiente y profesional partidonan politico.
Pero loke a sosode den e noticia di Power FM diaberna ultimo 8 di september no por carga e nomber di periodismo, esaki tabata simplemente propaganda politico bao capa di noticia. Loke Baboe Hoek, Ruben Garcia y Ralph Maduro a presenta diaberna ultimo tabata bao di tur nivel di un prensa respeta.
Partido ReD no ta mustra cara, asina nan a bisa, loke ta un mentira flagrante. Rudy Lampe, kende ta number 2 riba lista di ReD, a presenta no uno sino dos biaha den studio di Power FM. No ta Power FM ta bin dicidi den cas di ReD con nos maneho ta cu Power FM y cu prensa en general, mescos cu ningun hende por bin dicidi den cas di otro ta con e tin cu biba. Ta ReD ta dicidi internamente ki ora ta acepta un invitación y di ken.
Nan a bisa cu ReD ta manipulador, pasobra a papia di uso medicinal di cannabis pero ta humamento di e cos nan ta promove. Esaki ta ignorancia den prensa, pasobra un forma di uso medicinal di cannabis ta dor di huma esaki. Nos ta den Reino Hulandes, Hulanda ya tin 40 aña caba cu a tuma e decision sabio di distingui soft drugs di hard drugs, mescos cu nos ta distingui zwakke alcoholische drankjes di sterke alcoholische drankjes. ReD ta haya importante pa sigui e ehempel mescos cu un cantidad grandi di paisnan rond mundo ta haciendo. Cannabis ta un remedi di tera, cocaina ta un extrato quimico y ReD no ta propone pa legalisa cocaina sino cannabis so. Power FM a manipula caba plabranan di Rudy Lampe den pasado y awor ta saca palabranan di Ricardo Croes, lijsstrekker di ReD, for di contexto pa pinta nos scur den bista di pueblo. Nan a saka for su contexto e palabranan di Ricardo Croes “cu tur cos ta negociabel”, haciendo e radio oyente kere cu ReD ta un partido sin principio, loke ta otro mentira di Power FM.
Tin un dicho na ingles ta bisa “either you are stupid or you are crook”. Baboe, Ruben y Ralph no ta stupid toch? E ora e conclusion por ta cu Power FM tin un agenda politico y ta sirbi cierto interesnan y dealnan politico? Tin varios stacion di radio cu ta politicamente comprometi y kier pretende di ta obhetivo. Un periodista mester ta neutral y obhetivo. Bao capa di libertad di prensa Power FM ta purba susha nomber di Partido ReD Democratico, e unico partido cu un trayectoria solido anti-corupcion. Por ta pasobra Power FM tin interes pa corupcion sigui na Aruba?
