Tur preparacion ta den ful swing pa e di tres evento di prebenta di Caribbean Town Aruba, cu ta tuma luga awe diasabra. Durante e dia aki tambe lo rifa cuater pakete di credito pa cushina of electrodomestico na balor di Awg. 5.000 na cada bishitante cu reserva nan unidad den Caribbean Town Aruba.
“Nos sa cu yega na bo propio cas ta un esfuerso financiero hopi grandi, pues nos lo sigui duna tur di nos parti pa stimula, motiva y yuda tur futuro cumprado diseña e cas di nan soño na Caribbean Town. Esaki ta bira un tiki mas facil tambe awo cu e premio di credito cu nos a inclui pa yuda 4 feliz ganado cuminsa traha riba nan futuro cushina di nan cas”, asina director di e proyecto, Victor Acosta, a sigura.
Tur persona cu a reserva un unidad caba den e proyecto di vivienda aki durante eventonan anterior, tambe lo participa pa e premio aki. Segun e gerente di mercadeo y benta, durante luna di maart proximo lo anuncia e cuater feliz ganadonan.
Ta invita comunidad local pa bishita e di tres expo di prebenta di Caribbean Town Aruba, riba dia 18 di februari entre 4:00 pm te cu 8:00 pm y riba diasabra dia 19 di februari, entre 10:00 am te cu 8:00 pm. Esaki ta e ultimo oportunidad pa reserva un unidad na e prijs mas abou, esta e ‘pre-construction price’. E evento di dos dia aki, lo tuma luga na Boulevard Events Aruba, situa na Schotlandstraat 45 na Eagle.
Caribbean Town Villas and Apartments, ta e prome proyecto di condominio pa local na Aruba. E proyecto di residencia innovativo y sostenibel aki ta consisti di un total di 328 unidad residencial, parti den 256 apartamento, 40 town houses y 32 villa. Ademas, e ta inclui pool, cancha di deporte multifuncional, un plaza unda hende por socialisa, un parke pa mascota, un outdoor fitness center y un espacio pa polis di bario cu lo ta integra den e vecindario di Eagle.
Pa mas informacion por tuma contacto cu Caribbean Town Villas Aruba na 5867300, [email protected] of bishita nan pagina di Facebook y haci un tour virtual di cada modelo di vivienda riba www.caribbeantownvillas.com
