Caribang a cuminsa na 2019, enfoca riba musica di club di islanan ABC (Aruba, Boneiro, Corsou) organisa na Den Haag, Hulanda riba 11 di november, den cuadro cu celebracion di 11.11.
El a bira asina grandi cu despues di e pandemia nan a cuminsa organisa diferente evento. Pa casualidad Carnaval tabata nan prome evento y awor ta bayendo pa di tres biaha cu esaki ta organisa na Hulanda, pa nan tambe por disfruta di e calor di Aruba.
Eldwin Kock, promotor di Caribang y DJ tambe Arubiano ta bisa cu su persona hunto cu varios otro DJ ta percurando pa sigui trece e ambiente di Caribe na Hulanda den forma unico.
“Nos a logra varios meta cu nos a pone nos dilanti, nos a cuminsa nos plataforma di Youtube, ainda haciendo musica. Pero awor cu evento nos ta haciendo cosnan grandi manera Paranda Rubiano,” segun Kock.
Orwin Gomes ta Rey di Zomercarnaval 2023, hunto cu Sharicia Hasham, Reina di Zomercarnaval 2023. “Nos ta celebr’e aki un tiki mas diferente di con nos ta celebra na Aruba. Aki ta bini cu diferente cultura y tur ta bini hunto pa asina siña di diferente cultura, y haci un carnaval bunita,” segun Sharicia.
“Aruba tin cu celebra su carnaval den grandi, aprecia nos Arubianonan cu ta afo cu ta haciendo furor, vooral duna nan e elogio mi ta haya mas importante aworaki. Pasobra unda cu nos bay nos ta bisa nomber di Aruba y nos ta sigui promov’e,” segun Orwin Gomes.
Aaron Arenas, miembro di SMAC na Hulanda, ta bisa cu e ta contento di mira studiantenan y adulto na Hulanda cu por disfruta di e inicio di carnaval 70. Arenas: “Nos ta contento cu despues di hopi aña y practicamente prome biaha SMAC ta colabora cu hoben aki na Hulanda cu ta Caribang pa organisa un evento di Carnaval anto encurasha hoben y adulto pa sinti e calor di Aruba cu nos no tin aki.”
