Despues di algun siman di preparacion, diahuebs a tuma luga e competencia di Hot Wheels den e salanan di IMAX.
Devin de Veer, Gerente di Benta y Mercadeo di The Movies @ Gloria a splica cu e evento a dura cuater dia y el a cuminsa dia 18 di mei. Tabata prome biaha cu The Movies @ Gloria a bin c’un evento asina, pero a bin riba e idea door cu hot wheels ta hopi gusta den e ultimo temponan aki riba Facebook. Riba Facebook tin un acogida super positivo di e competencia di Hot Wheels, pa cual a bin riba e idea hunto cu Jan Flemming Boys pa cu Hot Wheels, cual nan ta bon den dje.
Door cu e secuela di Fast & The Furious semper tin un super bon acogida y en conexion cu esaki nan a drenta den contacto cu Jan Flemming Boys pa asina hunto organisa e competencia di Hot Wheels den e sala di IMAX.
Diesdos participante a bay cas c’un premio y e nuebe finalistanan tur a bay cas c’un cadeaubon di 50 florin. Di tres luga a bay cas c’un cadeaubon di 100 florin cu su plakaat, e di dos finalista a bay cas c’un cadeaubon di 150 florin mas un plakaat y e ganado absoluto a bay cas c’un cadeaubon di 250 florin mas un plakaat y tambe un set di hot wheels di Fast X.
Tambe Devin tabata tin palabra di gradicimento n’e staf di Gloria cu semper ta para tras di cualkier proyecto na The Movies @Gloria, Jan Flemming Boys cu riba un dia liber a bin pa sinta hunto y delibera kico por haci. Pa a kere den e idea y pa forma parti di e proyecto aki.
Tambe pa tur esunnan cu a participa of a bin wak e competencia, na tur esunnan cu di un of otro manera a haci e evento aki uno exitoso.
Si Devin a informa cu ya caba ta preparando pa un siguiente competencia di hot wheels, cu probablemente dia 10 di augustus y cu lo ta den estilo di Back to School, Hot Wheels Edition.
JAN FLEMMING BOYS
Jan Flemming Boys ta un grupo di persona cu ta bin hunto pa asina organisa competencia di Hot Wheels. Si tene na cuenta cu e pelicula di Fast X ta cay den e categoria den cual nan ta coriendo, cual ta Street Race, pero den Hot Wheels. Cu mucho gusto nan a acepta e invitacion pa hunto cu The Movies pa organisa e careda aki.
Lucas Geerman di Jan Flemming Boys a conta cu nan ta contento cu e acogida ricibi pa e evento aki durante tur e dianan aki di competencia.
E reglanan di pista cu normalmente nan ta haci ta cu e autonan ta bay den un paki cera y ta acudi cerca Jan Flemming Boys, pa pone e nomber riba lista di competencia. Y nan lo ta encarga cu henter e careda, pa ‘match’ e caredanan te na final ora cu e tin e ganadonan.
Un total di diesdos auto a pasa pa final y tabata den e mesun categoria di un careda di caya. Cosnan a pasa riba e pista, pero e tabata un ‘fair race’. Un di e reglanan ta cu e autonan mester a keda y tur dia e autonan ganado a keda na The Movies.
Tabata tin dia cu nan tabata tin mas participante y otro dianan menos. Pero en general por bisa cu e evento aki tabata uno hopi exitoso.
Na final Geerman a gradici tur e participantenan y tambe IMAX y The Movies @Gloria pa e confiansa y e oportunidad pa por a organisa e evento aki. Lo tin algun evento mas proximamente y asina cu tur detaye ta cla, lo anuncia esaki tambe.
