E tabata un noticia cu tur hende tabata papia riba dje. Un simpel combersacion di basta luna pasa a bira noticia di henter un siman largo na Aruba. E dos damanan cu a papia cu agentenan riba patruya. E combersacion ameno a causa cu a suspende dos Polis. Awe tin un solo Polis trahando bek y e otro na cas ainda pendiente pa nan yam’e pa bay traha. Hasta Hues a mustra cu e decision di Mando Policial tabata dramatico.
E dama “Carolina” cu a dal auto na Drive Inn a keda deteni pasobra e tabata burachi. Manera cu a saca e potret, e informacion a drenta cu Carolina ta e actriz principal di e “Patruya 37”. A resulta cu e tin basta luna na Aruba y a pidi asilo. Mientrastanto su asilo mester a wordo nenga despues di tur e lunanan cu a pasa. E no a bandona Aruba mas.
Awor si su careda a caba despues cu e tabata riba un paranda y a dal auto burachi y sin rijbewijs banda di rotonde Drive Inn. A hib’e Warda di Polis di Shaba unda el a supla y e resultado a sali malo p’e. Pa colmo e ta ilegal na Aruba. Den e mesun auto tabatey tambe un homber y un señora mas, ambos ta Latino. E señora ta di nacionalidad Dominicano y ta esun cu a graba e video ora e agentenan tabata papia cu e damanan. El a graba su mesun amiga y despues di algun luna e video a aparece riba caya y a bay viral. E tempo ey Carolina cu su amiga cu a haci e grabacion a rabia cu otro. Awor nan ta amiga atrobe y hasta tabata riba paranda te cu husticia a pone man riba nan.
Despues di hiba tur tres Warda di Polis na Shaba, a yega e momento di capitulo final. E capitulo final di Telenovela “Patruya 37” tabata na Warda Nos Costa unda cu den Dogcatcher “Patruya 26” e camerawoman, e artista principal Carolina y tambe e Producer a yega hunto cu Polis. Carolina ta Venezolano y otronan ta Dominicano. Nan ta deteni awor pendiente nan deportacion for di nos isla.
