Den e Toque de Queda di diahuebs 9 di April, a detene 13 persona, cual tabata un tiki mas cu e dia anterior.
Te cu diaranson manece diahuebs a detene 313 persona relaciona cu e situacion di Toque de Queda, Fiscal Pronk a informa den e ultimo conferencia prome cu e fin di siman di Seamana Santa. Toque de Queda a bay su 20 dia caba y Shelter in Place tin 13 dia, incluyendo awe, Pa Shelter in Place y Samenscholing verbod no tabatin detencion y tampoco a duna boet. Cinco negoshi a haya boet pa no cumpli cu orario di cierre y dos PV pa no cumpli cu cuarentena.
No lubida Toque de Queda y Shelter in Place ta keda na vigor. Por sali di cas pa yena gasolin, bay dokter of botica of cumpra / busca cuminda. No por cana of ta den luga publico mas cu 3 persona hunto. Si e famia tin tres yiu, no por ta hunto riba caminda publico. Polis por duna ordo pa plama e grupo for di otro. Si un persona no respeta e ordo, ta detene y hibe warda unda ta haya boet di 1000 florin for di fiscal.
Diahuebs anochi pa diabierna mainta tabatin en total 13 detencion. Entre nan tabatin un pareha deteni y hiba warda. Nan tabata den un D-wagen, cu ta auto di Gobierno. Den un version cu e cabayero a manda pa 24ora.com e ta bisa cu su señora tabatin hopi dolor di djente y cu e tabata na caminda pa dentista, kende e no por a haya na telefon. Segun e ta bisa, el a yama botica tambe pa mira kico e por haci. E version aki tambe el a duna na fiscal na momento cu Polis a yega cu nan na warda di Polis. Segun e ta bisa, a laga nan bay y a informa nan cu si mester di servicio bek den e dianan aki, mester yama ambulance.
Hecho ya cu si su version ta cuadra y por a prueba cu el a bay dentista y botica, e Polis riba caya mes lo a lag’e sigui su caminda pasobra esey ta permiti. E hecho cu e ta cu auto di Gobierno pa asunto priva, e no a comenta.
Den e detencionnan di marduga tabatin hasta di personanan cu parce tabata biniendo di un fiesta.
