Booshi Wever tabata para pafo di e edificio si Serlimar, unda cu el a expresa su preocupacion riba e situacion di Serlimar unda cu ta bibando un cultura di miedo di parti di e trahadornan. E ex mandatario a sigui splica cu si puntra entre e trahadonan, por bisa cu nan no ta di acuerdo cu e mudamento, pero tin algun tin miedo. Tin algun hende a keda cas mas cu un aña, tin algun a cay cera, etc. Ta cosnan cu ta sosodiendo. E cultura di miedo cu tin den Serlimar ta increibel. Si bay puntra cada un di e empleadonan si nan kier muda tur ta bisa cu no.
Ora cu ta bisa tambe cu caminda cu Serlimar ta, ta un area residencial. Area residencial ta caminda cu tin hende ta biba. Acaso cu na Pos Chikito no tin hende ta biba? Pa menciona un nomber, Junior Arends, acaso no ta hende?
Pa colmo nan ta bisa tambe cu lo bay uz’e pa reciclahe. Lo bay tin actividad cu sigur lo ta molester pa bisiñanan. Ta move bay eynan pa complace e Hulandes Europeo cu a sponsor den campaña.
E lo costa placa
Wever ta comenta cu e representacion di pueblo ta parlamento y nan ta kedando keto riba e asunto aki. Si bo ta kere cu ta 720 mil florin so pa huur, agrega cosnan cu ta bin. E trucknan. Por ta por para un di e trucknan, puntra cuanto ora nan tin cori. Esun di mas abao ta 8mil y e otro ta 12 mil ora. E trucknan aki tin un motor Mercedes den nan cu ta bon pa por lo menos 20 pa 25 mil ora, pero si mantene nan bon y haci poco cambio despues di 20 of 25 mil, e por bay te hasta 100 mil ora. Awo den un situacion deplorabel cu AVP/POR a laga Aruba aden, pasobra ta haci como sifuera cu ta AVP so, Otmar Oduber, Marisol Lopez-Tromp y Howell tabata eynan. Y awo nan ta haci como si fuera cu “yo no fui.”
Nan ta culpabel unda nos ta awe. Ora cu nos mira e derochamento di placa, e cos aki ta increibel cuanto placa ta bay gasta pa trucknan. Por mira e trucknan, si mira un di nan, e chasis ta blink, e chasis di un truck ta di truck di sushi. Ta di sumamente bon calidad y ta cambianan den un fixed bidden. Diripente ta cambia rekisitonan den bestek y ta cambia cu ta un dealer so mag di tin, djis pa complace. Cada un di e trucknan aki ta bay costa na lease, mas of menos 10.500 florin pa luna, biaha 22. Ta papia aki cu e lo sali 250 mil florin pa luna, pa cinco aña y pa aña ta 3 miyon florin y ningun hende ta papia riba dje.
Ora cu papia di incinerator, ta bisa cu simplemente no por. Na Aruba tin un minister cu ta keda para ariba y ta papia cu pronto tin cu tuma un decision pa bulldoze esaki. E incinerator aki, pa poco. Ningun di e companianan cu a bid, ta compania di YMCA. Tur e companianan cu a bid, ta bid pa gana placa riba lomba di e pueblo aki. Y ora cu haya sa cu e lo costa 1 miyon florin pa luna, pa mantene habri, pa otro hende gana placa, pa algo cu no ta waste to energy, sino waste of energy y waste of money.
Ora cu a tende cu ta muda di Parkietenbos pa Sero Tijshi, no ta bisa cu e mudamento ey ta bay costa pueblo di Aruba 210 mil florin pa luna. Esaki ta e realidad cuanto placa henter e locura di e minister aki.
Si pone hunto cu e locura na Hulanda, cu ta di Arubahuis, cu ta un propiedad di pueblo, bay huur un luga, aunke cifra no tin ainda, ta bay muda. Esaki lo bay costa pueblo di Aruba mas of menos 15 miyon 972 mil florin. Awo por compronde dicon no tin placa pa schoolgeld. Tin hende cu tin cu bay paga bek. Ta papiando di 1 miyon florin, sino mas di 15 miyon florin.
Pesey Wever ta bisa cu CAFT tin rason. Logicamente e ta bisa cu no ta un bestemmingsheffing, sino heffing pa hinca placa den saco di hendenan cu a financia e campañanan caro, particularmente partido POR, cual Wever ta yama gozaderaheffing.
Gasto y mas gasto pa Serlimar
Wever no ta mira nada drenta caha. Loke e tin di compronde ta, si Serlimar mester bay haci e proyecto di incinerator nan mes, conforme locual cu CAFT ta bisa, locual cu Raad van Advies ta bisa, cu no mag di tin mas PPP. Pero e unico manera cu kisas no ta bay costa locual cu Wever a menciona, ta un PPP. Si e no ta un PPP, gobierno di Aruba lo mester bay gasta por lo menos 1 miyon florin. For di eynan por ta e ta haya algo bek di coriente di porta e tin cu produci. Pero atrobe, e coriente cu e tin cu produci ta esun di mas caro cu tin. Esta Waste to energy ta e manera mas caro di produci coriente. Ta bay den e aventura ey siendo cu tin hopi otro manera pa bo deshaci di dje. Pero door di bo, hunto cu sr. Benny Sevinger, nan dos a boycotea e proyecto aki. No tabata tin un reunion cu a bay tocante di dump cu Otmar Oduber no tabata presente di bay papia over di papa, cu kico. Esey a grita pa por a boycotie. Hunto cu TNO, cu a hustifica e boycott, awe ta sinta den oficina ta mustra cu incinerator ta e miho opcion cu nos tin. Un locura total cu nos pueblo mañan tin cu bay paga p’e.
