Diamars den oranan di atardi a manda Polis urgente den direccion di Miraflores Weg patras di Lucky Store. A drenta un yamada cu tin un homber arma sinta bou di un mata. Segun e yamada e homber tin un arma di candela cu ne. Varios unidad di Polis a yega mesora na e sitio. E prome unidad tabata di trafico. A bay den accion mesora y cu man riba pistol e agente a exigi e homber sinta bou di e mata pa lanta para. A pidie lanta camisa pa controla su cintura. E no tabata tin arma di candela cu ne.
Polis a tira un extra wowo den e yerba unda e tabata sinta. Eynan a bin haya un cuchiu grandi cu e tabata tin cu ne. A hala e cuchiu mesora un banda. A cuminsa saca afo kico ta pasando. A resulta cu ta un guera pisa entre bisiñanan. E problema tin di haber cu un tereno cu no ta di nan. Esnan di Lucky Store lo a cumpra e tereno pa asina nan clientenan para.
E ta keda patras di Lucky Store. Dia di Black Friday tur e problema a cuminsa. E clientenan cu tabata para auto pa bishita Lucky Store a keda p’aden cu ta cobranan pa para auto mientras cu nan ta cliente y ta bin gasta placa den Lucky Store. Esey a keda e doñonan straño. Ora cu nan a bay chek a resulta cu berdad e homber cu Polis a topa bou mata lo tabata cobra pa clientenan para auto.
Algo cu no tabata tin autorizacion pa haci. E cos a bira un problema ora cu e mesun persona a topa un di e bisiñanan banda pabou tumando placa for di e doñonan di Lucky Store. Segun e bisiña banda pabou, ta placa di interes nan a bay cobra pasobra nan tata cu a fayece tabata fia placa. E bisiña cu Polis a topa cu cuchiu a bisa cu ta redashi e otro a bay haci na Lucky Store. Desde e Black Friday e tiramento di palabra y menasa a cuminsa. Esun ta tilda e otro di a bay haci shisheria dor di conta cu tin cobramento pa para den parkinglot di Lucky Store y e otro ta nenga esey.
Mientrastanto e situacion ta escalando pasobra cada biaha cu nan topa tin tiramento di palabranan menos bunita. Polis a confisca e cuchiu. Esun arma a bisa cu e ta usa e cuchiu pa defende su mes pasobra e tin brasa malo cu plachi y no por defende su mes asina. Finalmente Polis a scucha partidonan y a bisa esun cu a yama pa e otro arma pa entrega keho. E ruman homber cu no tabata tey ta esun cu parce ta sinti su mes mas menasa. Ta dilanti otro nan ta biba y awo den temporada di paz ta biba den un guera. Polis tin atencion pa e caso. Polis scucha tambe esnan di Lucky Store. Lo keda pendiente riba e denuncianan pa cu menasa y wak si Polis lo actua un poco mas severo. Polis a splica e partidonan cu mester evita discusionnan asina.