E luna di september ta uno hopi special pa Museum of Industry (MoI) cu ta situa den e
Watertoren na San Nicolas. E luna aki nos lo ta cumpliendo nos prome aniversario. Pa celebra
esaki nos ta invita full Aruba pa bin celebra hunto cu nos durante nos di dies edicion di
Experience San Nicolas cu lo tuma luga diadomingo 10 di september. Museo lo habri su portanan entre 10’or di mainta te cu 2’or di merdia y entrada lo ta solamente mita di prijs. Esunnan cu ta desea di haya mas informacion detaya di nos pasado industrial por pasa serca nos 12’or di merdia pa un tour special ofreci door di un di nos guianan. Pa e muchanan tambe lo tin opcion pa hasi un speurtocht chikito den e museo y lo tin un area special pafor unda e muchanan por pasa un rato divirtiendo nan mes. Parti pafo di museo tambe lo tin diferente actividad. Por pasa saborea distinto cuminda y cos dushi y e bar tambe lo ta bon surti. Nos house DJ lo percura pa entretene tur nos bishitantenan cu bon muziek y pa e muchanan tambe lo bai tin Dinojump y face painting. Tur persona cu pasa bishitanos por participa den nos “MoI challenge” cu nos ta bai tin entre 1 di september te cu dia 25 di september. Esunnan cu kier participa mester simplemente contesta tur 5 pregunta corecto y automaticamente lo participa den nos rifa cu lo tin diferente premio atractivo. E ganadornan lo wordo anuncia dialuna 25 di september. Marca 10 di september den agenda y bin celebra hunto cu e team di MoI nos prome aniversario. Nos ta warda boso na Sunrise City pa un dia ameno y festivo.
