Benjamin Francees ta propietario di un compania di siguridad cu desde 1999 ta activo den brinda servicio na su clientenan, esta Benjamin Security Services NV. Pa e eleccion na juni 2021 Francees a dicidi di distancia di partido CURPA y lo enfoca mas den comercio. E mundo politico na Aruba ta pasando den momentonan di retonan grandi, unda sector di trabou, social, economia y husticia ta sufriendo.
SU TRAYECTORIA COMO POLITICO
David Luis Benjamin Francees a apararece riba e lista di partido CURPA den e ultimo eleccion na 2017 como number 2 riba e lista. Benjamin Francees ta hopi conoci di e tempo ey caba den mundo di deporte y specialmente hopi cerca di Baseball unda el a dirigi e organisacion di baseball di mucha di bario rond Paradera/Piedra Plat, conoci como Giants Baseball Organization.
UN CAMBIO DEN POLITICA
E mundo di politica na Aruba a conoce un cambio den e temporada cu e pueblo lo mester a bay na urna electoral pa asina deposita nan voto riba un partido politico cu lo representa e bos di pueblo den Parlamento di Aruba, e organo mas halto den nos comunidad cu lo mester percura pa asina por goberna e pais aki den e miho forma. Ta un tradicion cu e temporada aki ta contene un sin fin di desaroyonan interesante. E creatividad di partidonan cu ta bay e contienda electoral ta traha un plan di gobernacion pa asina por bende e idea na e pueblo votado hayando asina e confiansa pa controla e proximo gobierno di Aruba.
Ta desea tur politico activo hopi exito y cu Aruba lo sa di scoge tremendo politico/gobernante pa nos pais. Por ultimo ta laga un punto cla: pa tur pone energia positivo, hopi entusiasmo pa saca nos pais padilanti.
TOCANTE BENJAMIN FRANCEES
David Luis Benjamin Francees di 46 aña di edad a bay scol y lanta na Boneiro. E ta doño di Benjamin Security y ta masha envolvi den deporte. Den eleccion na aña 2017 el a participa como candidato # 2 riba lista di partido CURPA y a logra 78 voto riba su nomber.
TOCANTE PARTIDO CURPA
M.R. Robert a funda Cristiannan Uni Reforsando e Potencial di Aruba (CURPA) dia 20 di Mei 2009. Lidernan desde fundacion: Cristina Lampe (2017). CURPA a participa 2 biaha den eleccion. Record maximo di voto: 468 (2017) y Record minimo di voto: 139 (2009). Ideologia di Partido CURPA ta Liberal.
