Ta hayando hopi reaccion di polis cu tin hopi auto cu ta envolvi den accidente cu no tin seguro. Como Henry van den Berg ta presidente di asociacion di seguro y alabes managing director di Ennia, ta conta cu ta berdad cu tin hopi auto envolvi den accidente sin seguro.
E porcentahe ta halto. E tin consecuencianan hopi halto y e daño mester wordo paga. Si e persona no ta sigura, esun cu a causa e accidente, ta un problema grandi, segun van den Berg.
Kico ta haciendo pa e situacion
Van den Berg a splica cu na prome luga ta bon pa meld cu coremento sin seguro ta un problema di nos sociedad. Ta pensa cu ta un problema cu no solamente por wordo soluciona pa gobierno, esta polis. Mester haci esaki conhuntamente. Como Asociacion di Seguro nan ta bezig cu esaki. Hunto cu polis, Forensys y Ministerio Publico, ta mira riba e diferente posibilidad con pa limita coremento sin seguro.
Polis mester toch percura pa cumpli cu ley pa steun den esaki. Ta mirando con por percura pa na prome luga, esnan cu ta core rond sin seguro riba caya, por wordo reconoci atendi y pa tuma accion riba esaki. En principio esun cu ta core sin seguro, mester ta poni na banda di caminda y tin cu lage sa cu e no por sigui core auto.
Kico e situacion ta nifica
Mester haci un distincion entre dos situacion. Un situacion caminda cu ta papia cu cliente di un seguro cu ta cubri pa WA. Si e haya un accidente cu un persona cu no ta sigura, ta nifica cu e no por claim su propio seguro, y tampoco esun di e contra partido. Esey ta nifica tambe cu e mes mester bay cerca e contra partido pa e regla e daño y esey hopi biaha no ta facil.
Tin e situacion cu un hende tin un Seguro Casco, y su auto tambe ta sigura si nan mes haci daño, e ora nan mes ta cubri nan mes, cual di un banda ta desbentahoso pasobra e premie ta subi.
Na momento cu un persona cu haya un accidente cu un persona cu no ta sigura, ta hopi fastioso, mirando e parti financiero.
Facilidad pa haya placa
E seguronan no ta un partido cu tin cu paga e daño riba esun cu no tin su seguro paga. Via Gobierno un hende mester wordo poni responsabel, mester traha un process verbal. Esey ta e unico manera pa por oblig’e pa paga. Como seguro, nan tin e tarea pa por ehecuta e seguro. Si un seguro cubri un auto, nan no ta e partido huridico cu tin cu percura pa un hende cu ta core auto sin seguro pa e por bay paga e daño cu el a causa. Seguro no ta pa esey. Polis mester haci esaki, na beneficio di esun cu ta e victima den e caso aki.
Porcentahe
Segun Henry van den Berg, no ta facil pa por haya e porcentahe di autonan sin seguro. Tampoco cu e ta yuda pa aumenta e concientisacion pa por sigura auto. El a menciona cu ta hopi importante pa tur partido envolvi yuda cu esaki. No solamente e seguronan, sino tambe polis, y tambe Ministerio Publico, como tambe Forensys. Tur hende cu tin di haber cu maneho di accidente y ta envolvi den e proceso, por contribui. E unico manera ta pa bin cu man duro pa asina e public realisa cu coremento sin seguro, tin su consecuencianan. No tin otro manera pa por haya e porcentahenan aki, van den Berg a menciona.
Autonan sin seguro y sin number
Seguronan sa haya hendenan cu ta paga dos luna por ehempel seguro pa haya un number di auto. Tin un dekking si. Pero tambe esey ta un problema cu hendenan na momento cu nan bay paga number di auto, ainda tin un dekking y despues di algun luna e seguro ta caduca y no ta paga bek. E ora nan ta core rond sin seguro.
Campaña
Van den Berg ta pensa cu te cierto caminda un campaña ta yuda. Pero mester keda inculca den comunidad pa paga seguro y e plachi di number. Na momento cu no ta algo cu ta wordo inculca, e ora hendenan lo purba pa no pag’e. Bida ta duro y no tur ora seguro ta barata. Por pensa cu pa hopi hende esaki ta hopi placa. Solamente cu e mester ta inculca. Ta e unico manera pa por soluciona e problemanan cu tin, van den Berg a enfatisa.
