Diasabra 27 di juli pa 17:35 e Centro di Rescate di Warda Costa( RCC) a ricibi informacion cu tin un barco di abastecemento, e MISS DEBBIE, den problema anto cu nan tin mester di ayudo.
Na e momento ey e barco tabata na 215 miya nortwest di Aruba y tabata sink. E barco tabata na caminda pa Aruba unda e tripulante lo a bay entrega e barco na su doño nobo. Mesora a lanta e avion Dash 8 di Warda Costa pa bay localisa e barco cu e tres tripulantenan cu tabata abordo.
Mientrastanto e Centro di Rescate di Warda Costa a manda un notificacion na tur barco den bisindario pa duna asistencia. HARUNA EXPRESS y e barco crucero SEA PRINCESS, cu tabata na caminda pa Corsou tabata den bisindario. Haruna Express no a logra pa rescata e personanan dor di lama bruto. E barco crucero si a logra di saca un boto salba bida y a busca e tres hende homber cu nan a bin topa den un boto di salba bida ya cu nan barco mes a sink. Tur tres persona ta di nacionalidad Mericano. Na yegada di SEA PRINCESS na Corsou a entrega e tres homber na autoridad.
FV YANA TA HAYA AYUDO DI CITRO
Diadomingo 28 di juli den oranan di mainta Centro di Rescate di Warda Costa (RCC) a ricibi informacion cu e boto FV YANA cu tabata na e momento ey dos miya for di Oostpunt tabata yena cu awa. Tabata tin tres persona a bordo. Mes ora a avisa CITRO cu na su turno a sali mes ora pa yuda e boto. CITRO a pomp saca e awa y a touw e boto hiba Caracasbaai. Un danki na CITRO y tur e otro boto cu tabata den cercania cu tambe a duna un man.
