Diasabra mainta trempan Aruba a ricibi e prome “call” di e barco crucero Evrima cu ta pertenece na e linea di “Ritz-Carlton Yacht Collection” den nos waf. Na yegada, manera ta custumber, e barco a wordo saluda pa e cañonnan di awa. E linea crucero aki pa prome biaha ta bin den nos waf di Oranjestad y por lo pronto e lo sigui bin Aruba tambe. Loke ta hopi remarcabel ta cu e linea crucero di Ritz-Carlton ta hopi nobo y ya caba nan a pone Aruba riba nan itinerario.
E barco crucero aki a yega Aruba cu un poco mas di 200 persona, e no ta un crucero grandi pero si e ta uno di luho y ta yega nos isla cu turistanan afluente cu ta laga hopi placa atras. Evirma ta un crucero cu por acapara un maximo di 300 persona, su cambernan ta consisti di solamente suites y e prijs pa camber no ta baha bou di 5 mil dollar pa persona. E ta un crucero cu ta ofrece su pasaheronan trato di primera clase y un experencia luhoso.
Minister Dangui Oduber ta hopi contento cu e linea crucero di Ritz-Carlton a pone Aruba riba nan itinerario. E mandatario ta contento con turismo crucero, den aña 2022, a conoce un recuperacion di casi 74%. Den aña 2023 ta proyecta cu Aruba ta bay ricibi alrededor di 800 mil turista crucero cu sigur ta un noticia masha positivo.
