Rodrick ‘Rocco’ Franken artista multitalentoso cu un trayectoria di puro exito for di edad basta hoben. No solamente local pero internacionalmente e nomber di Rocco of Rocco Flava semper a resona cu cancionnan inolvidabel y di un calidad haltisimo.
Siguiendo di cerca e movecion di cada artista riba nos isla, a bin tuma nota di un presentacion special cu Rocco a haci acompaña pa un banda diferente riba ful un otro vibe. Rocco a comparti cu en berdad e ta masha contento di por presenta cu e banda aki, bou direccion di Jeremy Bonarriba, cu tampoco no ta un nomber desconoci. Un genio musical tras di e drum y cu ta gosa di su admiracion no for di awo pero for di su epoca cu banda Intwine cu otro artista di caliber, esta Rodger Peterson.
E oportunidad y acercamento a presenta di parti Bonarriba y sin ningun duda Rocco a acepta e invitacion pa asina forma parti di un idea y reto nobo aki, debi cu ta un vibe completamente diferente cu locual e ta custuma cu ne, algo for di su ‘comfort zone’.
Como artista e ta un bendicion di a nace na Aruba, den e region Caribense y influencia door di asina hopi cultura, pa por sali for di un estilo y drenta den un otro pa asina acepta e reto pa demostra bo mes cu e ta posibel, ta locual cu Rocco a comparti.
E proyecto ‘Bandilama’ cual ta nomber cu a pone na e banda aki, ta algo cu ta peculiar. A yam’e un proyecto como cu practicamente tur integrante ta perteneciente na otro banda. Esey mes ta haci cada presentacion bastante dificil como cu pa por yega hunto tin cu duna chens na cada musico pa logra haya un espacio habri den nan agenda/ compromiso cu nan banda, pa esun aki por forma y toca.
Idea ta pa semper busca un fecha, logra un localidad y asina ‘have fun’ hunto como musico profesional cu cada un di nan ta y duna un presentacion di calidad.
Den un pregunta di curiosidad, cual a pone un sonrisa basta grandi na Rocco su cara, kier a haya sa cuanto aña mas o menos Rocco tin di trayectoria artistico. E artista a bisa:” Mi tin miedo di bisa bo, haha, pero e ta yega den su trinta nan ey”. Bendiciona di a cuminsa na un edad sumamente hoben, apenas nuebe aña cantando ranchera, cu a evoluciona den su participacion den tumberito, na momento cu a yega edad di 18 aña a forma parti di su prome banda musical y te cu e dia di awe ta den e ambito di musica bailabel, como tambe esun Latino.
Oportunidad a surgi cu ‘Bandilama’ den e temporada di pandemia y cual e ta masha gradicido y cu ta acepta cada biaha cu logra yega na un presentacion, pa deleita e publico cu algo diferente di su parti.
Rocco no ta para keto, esey su fanaticada sa di dje for di semper. Por spera produccion nobo y ta locual e artista mes a confirma. Pronto lo ta saliendo un cantica nobo, ta relaciona cu fiesta cu den e dianan aki lo tuma luga na Aruba. Lo ta den colaboracion cu un duo di Hulanda yama ‘Two Sync’ y acompaña pa e banda Buleria. Rocco ta sigur cu lo ta otro exito mas y cu e publico lo gosa masha hopi di dje.
Intencion lo ta na prome luga saca e produccion musical aki prome y despues trata riba e videoclip cu lo ta e siguiente paso pa e presentacion di e cancion nobo aki.
Farandula di Aruba tabata e siguiente pregunta na Rocco y den su opinion farandula ta algo cu ta rico na diferente sabor, ta bibo, despues di pandemia a recupera bastante y no por keda di e bendicion cu ta ricibi di esaki.
