Ban yuda GKMB door di yuda nos mes: Deshaci di artefactonan cu por forma criadero di sangura

GKMB ta tuma e oportunidad e siman aki pa concientisa comunidad, cu e peliger cu nos ta coriendo awor aki di e gran cantidad di sangura, cu tin actualmente.

Segun Luis Chong, hefe inteirno na GKMB, ta tuma e oportunidad pa pidi cooperacion di comunidad pa controla y deshaci di artefactonan cu tin rond den nos cura, cu por contene awa, cu por forma criadero di sangura.

Awe, un biaha mas nos isla a wordo bendiciona cu un awasero y esaki ta un di e motibonan pakico tin hopi sangura.

E otro motibo ta hende. Nos mes. Nos comunidad, cu ta laga sushi of cualkier otro artefacto of cu ta contene awa den hemchi, den bari, tairanan cu tin benta rond di nos cas, bakinan di mata, cu awa ta keda para aden, tur esakinan ta nos mes ta pone esakinan rond di nos cura, rond di nos barionan, cu ta forma hunto cu e awasero claro, e criaderonan.

Tin un mito cu awa ta yobe, cu tin hopi yerba y pesey tin sangura. E mito no ta asina. Yerbe no ta trece sangura. Sanguranan ta bin door cu nan ta haya un luga pa crece y esakinan ta den e pochinan di awa cu tin, e barinan di awa, of e taira cu nos tin benta patras di cas.

Segun Chong, a ripara enberdad cu no tin casi nada di transmision di Dengue, Zika of Chinkungunya e aña aki. Tabata tin tiki suerte den e ultimo simannan aki, aunke cu tabata tin un caso isola registra, e stand van zaken ta cu 20% di e casnan cu ta controla, tin criadero di Aedes Aegypti. Esaki ta dos di cada 10 cas. Un di cada cinco cas. Imagina cu den e bario tin un criadero di sangura. Ta un potencial grandi di peliger pa un brote of un epidemia aki na Aruba.

Sarcsticamente bisa, Aruba ta cla pa un epidemia. Nos tin e vectornan bulando rond. Si nos tin mala suerte cu un hende bin di afo, por ta cu un Dengue, por ta un tipo cu hopi tempo nos no tin na Aruba, por ta tipo 2, por ocasiona un brote grandi, un epidemia hasta riba nos isla.

Hopi biaha GMKB ta haya yamada di molester di nos ciudadanonan y nan como entidad, ta atende cu e casonan aki. Pero ora cu bay, ta ripara cu e personanan mes cu a yama, ora cu controla nan cura, eynan mes ta haya criadero. Hopi biaha ta pensa cu tin biaha ta e bisiña tin e hemchinan di awa. Pesey e suplica ta bay pa un y cada un persona di nos comunidad, pa sali p’afo un rato, djis controla den cura, dos minuut, bo ta wak unda e awanan aki ta para. Elimina e criaderonan aki. E problemanan mas grandi cu tin awor aki, ta e hemchinan di awa, barinan di awa, cu personanan ta tuma awa den dje.

Tairanan ta un problema cu ta surgiendo masha grandi mes na Aruba.

Tur caminda ta hayando taira. Hendenan ta warda taira den nan cura, por sea caso pa usanan bek. Si ta asina bo kier usa e tarianan aki bek, wardanan bao di dak, unda cu awa no por yega cerca di nan.

Coy hunganan cu muchanan ta laga den cura, por forma criadero. Tin biaha ta haya weya den cura benta. Lona tambe. Tin personanan ta tapa santo cu nan tin den cura, nan tin lona ta tapa esakinan. E plasnan chikito aki cu ta forma riba e lona, ta forma un criadero di sangura.