Na Berlin durante e ‘World Games Special Olympics’ tin un categoria cu jama ‘Unified’. Esaki ta nifica cu un atleta normal ta forma un duo hunto cu un atleta special. Den e caso di Aruba, e isla ta participa den e disciplina di badminton como un ‘unified team’. E atletanan ta Orlando Arends y Mildred. E team ta haya guia di coach Ruben Croes. Diamars e team a hunga dos wega entre otro contra di ‘Chinese Taipei’. Nan a logra gana un wega y perde uno. E weganan aki tambe ta forma parti di e ‘divisioning’ cu ta sirbi pa establece e nivel di e team. Durante e proximo dianan e weganan oficial lo cuminsa.
Pa Orlando Arends e ta un placer pa forma parti di e weganan aki y esaki ta un experiencia completamente nobo. Nunca e no a yega di hunga cu un atleta special den un competencia. Orlando a cuminsa train hunto cu Mildred seis luna pasa. Orlando ta splica cu durante di e wega mes e ta hopi importante pa comunica cu bo partner. Pa Mildred e experiencia aki ta uno bunita unda cu e ta logra representa Aruba den e weganan internacional di Special Olympics. E ta sinti su mes bon na Berlin y e ta cla pa e competencianan cu ta na caminda.
Ruben Croes ta e coach di e duo aki. Croes a comenta cu durante di e weganan di diamars e organisacion a pone e team di Aruba cu ta un ‘Mixed Doubles’ (un persona masculino y un femenino) hunga contra di un team di ‘Doubles” (dos masculino). Esaki normalmente no ta mag di pasa. E coach a informa e organisacion pa percura pa durante e competencianan oficial esaki no pasa.
Digicel users let’s support Special Olympics by donating Afl 1,- by texting 𝗕𝗘𝗥𝗟𝗜𝗡 to Nr 5151!
