Preocupacion grandi pa locual ta trata situacion di entrada di nos Rubianonan cu ta ricibi cuido medico, tanto pa esnan local como esunnan cu ta den exterior y/o tin famia den exterior. Pashentnan cu nan tratamento a termina pero cu tin simannan largo ta spera riba un manera con pa denta Aruba bek
Locual cu ta pidi , ta un claridad riba e situacion.
Pa duna oportunidad, 24ora.com a tuma contacto cu AZV pa duna un clarificacion riba e preocupacion andando. Solange Tjon vocero di AZV a conta lo siguiente.
Desde comienso cu a detecta e prome caso di Coved-19, cu ta 13 de maart en adelante, e retonan cu AZV a confronta tabata dificil pa cu e pashentnan den exterior bou tratamento. No solamente pa esnan na Colombia caminda gran mayoria di e aseguradonan ta bay, pero tambe esunnan na Hulando y Merca.
Locual AZV a haci ta hunto cu Colombia filtra entre e pashentnan y evalua cua na e momento ey mester a keda / continua y/o termina nan tratamento pa por trece nan bek. AZV di e momento ey a charter 2 avion pa asina trece e pashentnan,for di Colombia, cu por a biaha. Tin cu corda esnan cu a keda a tras pa tratamento a confronta cu frontera tabata cera y a bira dificil pa por a sacanan.
Situacion na e momento aki
AZV na e momento aki ta den deliberacion pa un tercer charter cu lo tin cu transporta 44 pashent ( te na e momento aki ) for di Colombia cu mester regresa Aruba di cual a keda pega y ta bou di encargo di AZV.
Ta pidi un poco di pasenshi
Solange Tjon tambe ta consciente cu e situacion ta uno fastioso, pa tur partido, pa e famia, pa e pashent y pa e acompañente social di cada persona envolvi den exterior. Di parti famia, a ricibi hopi yamada/ emails riba e status di cada pashent.
Lo informa riba e tercer charter
Mientrastanto no tin informacion concreto, no por pone un fecha ni orario fiho. Locual cu si e vocero di AZV ta enfatisa cu ta tene tur hende informa pa asina duna e paz mental cu ta continua riba e tramitenan pa asina trece tur ciidadano cu AZV ta atende cu nan.
Tin cu corda cu Colombia tambe ta den e mes un situacion relaciona cu Coronavirus, nan situacion no ta bou di control ainda, nan cifra di personanan contagia no a baha manera esun di nos Pais y como tal e parti logistico ta bastante dificil pa planifica y asina logra saca e pashentnan cu ta pega. Tin cu tene na cuenta cu tin cu transporta cu bus of otro manera, esnan cu ta na otro cuidad y asina tin tur hende na un aeropuerto pa transporta pa Aruba.