Mambo Beach. Asina e tabata wordo yama den pasado. Despues den añanan 80, Bushiri Hotel y Hotelvakschool a wordo construi eyriba, unda cu el a conoce su epoca di oro. Pero el a cay den decadencia.
Apesar cu a bin varios intencion pa por habri’e di nobo, esaki no a logra. Tabata tin adictonan ambulante cu tabata cende candela, creando tambe un aspecto sumamente scur y mahos pa nos bishitantenan y hasta pa nos mes como Arubiano. Despues di varios aña den discusion, Gobierno anterior a dicidi cu lo sloop e luga y haci’e bek un luga publico, caminda cu grandi y chikito por haci uzo di dje.
E limpiesa di ex Bushiri Hotel a tuma luga y awe e lo keda cla. Corne van den Broek ta director y doño di We Build It Construction, ta conta cu nan a cuminsa despues di eleccion. Despues nan a kita tur asbest cu tabata tin riba vloer, tur sushi tambe. E material cu tabata tin den e hotel, loke ta staal, palo, etc, a wordo deshaci di dje. Cada biaha cu kita un pida asbest, e tabata wordo laga liber pa DTI. A keda solamente e vloer, despues cu a kita tur loke ta para. Despues a kita tur vloer. Como ultimo, edificio D. a keda para mirando cu tabata tin asbest aden y esey tambe den dos dia, a kit’e. Despues a dura dos dia pa saca e fundeshi afo. A tuma dos siman pa ruim op y awe lo kita tur heki y desde e ora eynan, e lo ta habri pa publico.
E desperdicio a wordo warda riba un tereno y lo bay recicla esaki despues.
Kico mester keda atras
Santo blanco mester keda atras y esey a logra tambe, segun van den Broek.
Reaccion di publico
Pa loke ta reaccion, tin hopi hende tabata saca potret. Tin biaha nan ta bin y ta bisa cu loke a sosode, mester a sosode 20 aña atras. Awo tur hende ta entusiasta. Awo tin un beach pa e Arubianonan. Awo nan tin un pida beach extra.
Adictonan ambulante
Van den Broek a splica cu na momento cu nan a yega, nan a bin topa cu 5 pa 6 adicto ambulante. Un di nan a keda te na e ultimo momento, ora cu a sloop edificio D. Hasta koper nan a bin busca manera pa haya, pero lamentablemente, tur cos a bay.
Dolor di cabes
E dolor di cabes mas grandi ta cu e asbest. Esey ta loke nan mester a traha cun’e y DTI tambe tabata envolvi. Nan a haci hopi trabao riba dje cu a dura varios dia. Awo nan ta bezig pa algun dia. Tambe e trabao a haci cu nan a soda hopi y esey ta loke cu nan tabata tin problema door di e particulanan di e asbest tabata bin pega riba nan.
Cancha di tennis
E cancha di tennis y e parkinglot a keda. Segun van den Broek, semper e cancha di tennis por wordo uza. Tambe nan por haci uzo di dje pa hunga futbol. Logicamente e mester keda hente. E parkinglot, si hende bay eynan pa bay beach, por pone e auto riba e parkinglot. E ora e no mester para riba santo, haciendo un division unda bo por bin cu bo auto y unda no.
Proyecto
Despues cu a kita e asbest, a papia cu DTI y DOW. E ora a dicidi cu lo traha un total di 6 ora pa dia riba e asbest y ora e momento a yega, a cumpli cu esey. A pone cu a caba prome cu pasco y a cumpli cu esaki tambe.
