E dianan aki diripiente ta haya diferente hende na mi consultorio huridioc cu nan permiso a wordo nenga dor di Dimas. Mayoria tin e fecha di 25 di augustus. Ora mi a haya mas cu 30 persona, mi ta lesa e motibonan y mi ripara cu casi tur ta hende cu tin 7, 8, 9 anja caba na Aruba mi no por otro cu conlcui cu algo ta pasando na Dimas. Prome cu mi sigi tocante e manipulación y política sushi cu lamentablemente ta parce ta reina den Dimas laga mi duna un par di e ejempel cu ta papia pa nan mes. Tin un cliente cu a bin como minderjarige Aruba pa gezinshereniging cerca su mama. E mama pa colmo tin paspoort holandés. Ora e bira meerderjarig e bai traha pa un compañía den un cierto función. Despues di duna 6 permiso pa e función ey, dirinpiente Dimas ta dicidi di nenga e permiso pasobra e compañía lo ta fungi como uitzendbureau y no lo por garantiza trabou fijo. Esaki después di 6 permiso asina. Cos ta bira mas stranjo ora mi haya sa cu departamento di Labor y DPL ta bisa cu e compania aki NO ta un uitzendbureau. Mi ta puntra mi mes ki sorto di decisión esaki ta y kiko lo ta su tras. Mas ora mayoria di e permiso nenga ta situacion similar na unda hende ta traha anjas pa un compañía den un cierto funcion y ta gewoon pidi verlenging, pero awor un luna prome cu elecion Dimas ta dicidi di nenga e permisonan aki cu motibonan fofo. Na mes un momento mi ta ripara un partido político ta cumnisa campanja fuertemente den e latinonan. Rara. Por argumenta cu esaki ta hende cu permiso y cu nan no por vota, pero hende cu tin 7,8, 9 anja akinan sigur conoce compatriotanan cu paspoort holandés cu si por vota. Manera e cliente den mi ejempel. Su mama si por vota. Na scol nos a sinja cu 1 + 1 = 2. E ta hopi di lamenta cu aparentemente un departamento gubernamental, na unda esunan cabez ta wordo bon paga dor di pueblo pa hasi nan trabou, awor den dia cla ta coopera di purba di manipula e elecion vendidero dor di hunga cu e trankilidad di hende digno cu tin anjas akinan contribuyendo na nos comunidad. Sigur sigur mester investiga e asunto aki y tuma medida necesario, con a laga manipulación político na bienestar di un partido (desespera ?) drenta den un departamento manera Dimas. Un partido cu tur hende sa den pasado no tabatin ningun compasion pa e comunidad latino
