Awe t’e dia: Ta corona Charles III como Rey di e Britaniconan, aunke nan no ta dje fanatico di dje manera nan tabata di su mama. Ta mira Charles mas tanto como un “Rey interino”. Reina Elizabeth ta sigui domina den tur encuesta di popularidad, sigur pa 80% di e Britaniconan, hasta despues di su morto.
Na di cinco luga
Charles tin sapatonan grandi pa yena. Y te cu awo, no ta parce cu e ta capas di haci esey. Solamente un mayoria limita di 55% di e Britaniconan ta positivo riba su potencial como Rey. Asina mes e ta bin na di cinco luga den popularidad, despues di su mama defunto, su ruman Anne, su yiu William y su nuera Kate.
Añanan di turbulencia
Mester menciona cu e ultimo añana tabata turbulento pa e imagen di e famia real Britanico en general: e memorianan revelado di Prins Harry, e entrevistanan na television di Harry y Meghan y e denuncianan di abuso sexual contra Prins Andrew, ruman homber di Charles.
Placa t’un problema
Y tin un otro problema pa Charles: e gastonan pa mantene famia real. Algun Britanico ta pensa cu e gastonan ta demasiado halto. E contribuyente di impuesto Britanico ta sinti cu esaki ta placa benta afo. Y esey mientras, segun informacion, cu e famia real ta recauda miles de miyon den un pais unda por lo menos 20% di e poblacion ta biba den pobresa.
Fin di famia real?
Hopi ta cuestiona si esaki lo ta e final di e famia real bou mando di Rey Charles. E pregunta ta si esey lo sosode? Pero, ta bon pa aclaria cu 62% di e poblacion ta sigui confia y ta kere cu Rey Charles lo haci un bon papel como Rey di Gran Britania. Aunke cu solamente 7% ra kere cu e lo haci un miho papel cu su mama, Reina Elizabeth.
Rey interino
Tin hende ta mira Rey Charles como un sorto di Rey interino, pasobra e tin 74 aña di edad. Ta mesun edad cu Reina Beatrix di hulanda tabatin ora el a anuncia su retiro. Specialmente e hobennan tin masha poco interes den e Rey nobo. Pues Charles lo mester haci hopi aina pa gana nan apoyo. Pero e lo logra? Basicamente, Rey Charles ainda no ta uza celular, por lo tanto, yega na e hobennan lo bira un reto y un trabou pisa p’e.
