Awe varios candidato di partido AVP a reuni riba e caminda di Santa Helenastraat y Belgiestraat na Playa. Nan ta satisfecho cu e acogida di pueblo di Aruba, rond di e campaña electoral andando. Awe a parti sticker na automobilistanan pasando eybanda riba caminda. Hopi a hasta baha pa topa cu e candidatonan presente cant’i caminda.
Robert Candelaria, candidato number 7 rib’e lista di AVP a menciona cu e acogida tabata tremendo. Diferente colega di partido a uni, manera team di Benny, team di Giovanni Arendsz, team di Wendrick Cicilia, team di Juan Manuel Kelly y team di Robert Candelaria. Esaki ta e ultimo diabierna prome cu eleccion, den cual ta parti sticker pero tambe informacion. Candelaria a menciona cu e hendenan ta para nan auto y pidi pa pasa na nan cas pa nan por haya bandera.
Robert Candelaria a bisa cu keto bay ta keda haya peticion pa pasa y haci bishita na cas. El a corda tur votado pa prepara nan identificacion y carch’i voto. Nan ta cla pa rescata nos pais.
PLAN DI HUSTICIA
E candidato a menciona cu den tur area di husticia ta sinti cu tin intrankilidad enorme. E ta mira cu ta necesario pa dialoga pa trece paz bek den husticia. Loke cu nan ta sinti ta cu pueblo no kier solamente pa baha criminalidad pero kier sinti nan mes sigur. Nan tin un plan cla pa ehecuta.
JUAN MANUEL KELLY
Juan Manuel Kelly ta hayando bon reaccion, e hendenan ta demostra apoyo na partido AVP. Esey ta duna nan energia pa sigui. E ta sinti cu awo e hobennan ta mas critico, nan lo ta e clave den e eleccion aki. Kelly, como esun mas jong riba lista, ta haci su best pa ta un ehempel pa e hobennan. Juan Manuel Kelly, candidato # 25, ta un studiante na Universidad di Aruba, studiando ley.
GIOVANNI ARENDSZ
Giovanni Arendsz a bisa cu pueblo no kier mas medida y nan mester un cambio. Desde aña 2017 a stanca deporte y minister Dangui Oduber no a haci nada pa esaki. E plan cu AVP tin pa deporte ta grandi. Giovanni a bisa cu ciclovia lo bin bek. Pa loke ta trata e situacion di Benny Sevinger, Arendsz ta menciona cu ora nan drenta cas, nan ta haya reaccion cu pueblo ta rabia pasobra nan ta sinti cu esaki ta un persecucion politico. Na 2017 a hacie cu Paul Croes y awo ta hacie cu Benny Sevinger.
SORTEO DI RIFA
Durante a partimento di sticker a saca ganado di rifa. E prome ganado ta e bufete di abogado Sjiem-Fat y e di dos ganado ta ticket number 02007. Pabien na e feliz ganadonan. Nan a gana bale pa haci compras di comestibles.
