Pa presenta e iniciativa pa adapta e Landbesluit Bijstandsverlening cu ayudo financiero na famianan cu un yiu bao di 16 aña cu limitacion, a bishita e organisacion Sonrisa y a reuni cu miembronan di e organisacion aki. Sonrisa ta un iniciativa di mayornan pa duna acogida y guia na muchanan menor di edad cu tin reto fisico y intelectual. Lider di fraccion di AVP, mr. Mike Eman, parlamentario drs. Mervin Wyatt-Ras y Wendrick Cecilia a combersa cu e coordinado Angelique Perez-Kelly y dos lider, di cual un di nan ta mama di un cliente.
A duna splicasion encuanto di e proposicion di cambio di e Landsbesluit pa ehecucion di articulonan 8 y 19 di e ley cu ta reglamenta e Landsverordening Maatschappelijke Zorg. Esaki di tal forma cu despues di articulo 8 cu ta reglamenta e Gehandicaptenuitkering pa un mucha/persona riba 16 aña, ta agrega un articulo nobo 8a. Articulo 8a. ta reglamenta e derecho di bijstand di un mayor cu yiu cu limitacion di edad mas hoben cu 16 aña. E provision aki ta conta pa muchanan di edad mas hoben cu 16 aña cu tin un limitacion fisico y/of mental. E cuido y educacion di un mucha cu limitacion fisico y/of mental ta trece cu ne gasto adicional pa famia. Por pensa riba sosten pa cas, manera por ehempel pago di ayudo domestico, pasadia, adaptacion na vivienda, cuminda special, transporte of guia extra. E gastonan ta mas halto cu e cuido normal y di educacion pa un mucha. Falta akiden por trece e calidad di bida di e famia y di e mucha den desbentaha enorme.
E Kinder- Gehandicaptenuitkering ta maximo 950 florin, igual cu e suma menciona den articulo 8. Conforme Censo 2010 cu tin 318 hoben cu limitacion por sali afo cu awendia nos por tin 400 hoben cu limitacion bao di 16 aña. E suma aki por yuda e hoben y su famia pa cumpli cu tur necesidad pa garantisa manera Derechonan Humano ta indica tambe un calidad di bida digno.
Durante e reunion cu representantenan di Sonrisa a intercambia den extenso encuanto experiencia di mayornan pa loke ta trata e reto di haya tende cu e mayor tin un yiu cu un deficiencia y cu e deficiencia aki ta permanente. E hecho cu un mayor di hopi trempan por nota cierto señalnan cu tin un of otro desaroyo cu ta diferente no necesariamente nifica cu e diagnostico ta tempran. Mayoria di mucha ta ser diagnostica ora nan tin 5 of 6 aña di edad. Aki e mayor ta experiencia cu no tin mucho sosten for di tempran pa loke e ta pasando aden. Eman, Wyatt-Ras y Cicilia a keda impresiona cu e trabou di Sonrisa.
E representantenan di Sonrisa ta haya e idea di un gehandicaptenuitkering pa hobennan di edad bou di 16 aña un bon iniciativa. Ta haya necesario si pa por tin control riba gastamento di e suma, locual lo mester ta den man di e instancia cu ta otorga e suma menciona.
