Autor Desiree Correa a entrega su ultimo buki titula ‘Drama real’ na directora di Biblioteca Nacional Aruba, Astrid Britten y tambe un ehemplar a bay pa e Coleccion nacional. Zetsia Ponson a ricibi esaki pa Deptamento Arubiana.
Autor Desiree Correa tin un carera den mundo literario impresionante y a contribui cu hopi publicacion manera entre otro, ‘Mosa’s eiland’ (un buki cu tin 38 aña riba lista di literatura hubenil di Aruba), ‘Compa Nanzi’, ‘Domi di den mondi’, ‘Manuel’, ‘Doño di curpa’ y ‘Den kibra di marduga’. Y mucho mas. Por cierto, ‘Den kibra di marduga’ ta accesibel den coleccion digital di biblioteca: https://digital.bna.aw/?arub-978990468151
Desiree Correa a traha 43 aña den enseñansa na Aruba y awor tin poco mas tempo pa dedica na su pasion y haci locual Desiree ta gusta. Ta tuma hopi energia, tempo, pensamento pa organisa e fluho di skirbimento y crea storia diferente. Desiree a cuminsa skirbi ‘Drama real’ den periodo di lockdown na Aruba. E autora semper tabata interesa den experencia emocional di mucha y hoben y ta stimula pa nan usa nan creatividad pa expresa nan mes den diferente forma. Autor y contador di storia Desiree Correa a participa pa 15 aña na e Festival di Buki pa Mucha di biblioteca. Por haya mas informacion di Desiree Correa riba website di biblioteca.
Riba portada di e buki nos ta lesa un sinopsis di e storia: “E novela ta trata di un pareha locamente namora, cu ta mira nan felicidad yega na alcansa un nivel halto cu yegada di nan morocho. E yegada di e dos muchanan Jani y Juani ta e colmo di felicidad pa e mama. No pa e tata, kende ta sospecha cu su señora tabata infiel. Di ki otro manera bo por splica e aspecto fisico di rasa preto di e muchanan? Tanto wela como welo part’i tata tin desendencia Europeo, di unda anto e muchanan a sali cu cabey yen di krul cera y color di mispel? Comosifuera esaki no ta suficiente, e welo part’i tata ta un homber sumamente machista y ta discrimina no solamente color di cuero di un persona, sino tambe hende muhe”.
Na biblioteca nan ta hopi contento cu Correa ta contribui na e mundo literario di nos isla y pronto e buki lo ta den circulacion pa miembronan por fia. E buki ta obtenibel pa cumpra na Plaza Bookshop y De Wit & Van Dorp pa 35 florin.
