Dialuna ultimo, unidadnan di bombero y di polis a bay cu urgencia na un cas den Jan Steenstraat, caminda cu lo tabata tin un candela feroz.
Central a bati alarma net cinco minuut prome cu 12’or di merdia y pa e hecho aki, a dicidi pa cera e camindanan conecta na e caya, pa di e manera aki, Cuerpo di Bombero, haci su trabao di paga e candela. Den e cas, bomberonan a bin topa cu e curpa sin bida di Dominico Candido Wernet, naci na Aruba, dia 3 di October 1954, esta 64 aña. Dokter Texier a constata morto pa 1’or y 40 y e curpa a keda confisca pa fiscal. Departamento tecnico y Recherche San Nicolas a keda na e sitio pa asina conduci nan investigacion.
Diahuebs mientras tanto tabata tin e autopsia riba e restonan mortal di sr. Wernet. Autopsia a mustra cu el a fayece a consecuencia di a stik. Di tur manera, e tabata ainda cu bida na momento cu tabata tin e candela. E resultado di e autopsia no ta nifica ningun momento cu ta exclui un crimen. Ta pesey mes, polis ta sigui cu e investigacion.
Sinembargo e curpa di Dominico Wernet a wordo duna liber pa e famianan, pa asina por hib’e na su ultimo luga di sosiego. Mientras tanto, ta keda pendiente kico e investigacion ta saca afo, si ta trata aki di un candela intencional, of e por tabata otro cos.
