Por lo menos un persona lo drumi contento awe nochi. Diasabra 11 di november 2023 (11-11-2023) a tuma luga entre otro e sorteo di Lotto 5. E premio mayo tabatin como premio un bunita suma di 1 miyon 900 mil florin. Un suma cera y gordo, pa cual cualkier persona lo kier gan’e. Pero, pa e biaha aki, ta solamente un persona tabatin e suerte di hunga e combinacion perfecto cu a sali esun ganado. E numbernan ganado ta: 01-22-24-30-34.
Un solo persona a cumpra e numbernan menciona, te ainda no ta conoci si ta un number fiho of si por ta un lotto loco. En todo caso, ta na Suemar Lottery II el a cumpra e ticket ganado si. Suemar Lottery II ta keda na Sero Biento. Aura Bremo ta propietario di e punto di benta. Diasabra anochi pasa di 8:00 pm 24ora.com tabata presente na Sero Biento pa combersa cu doño di loket. Bremo a conta cu e ta sumamente contento cu un di su clientenan a gana e Lotto 5.
E tin tres punto di benta, un na Paradera, esun na Sero Biento mes y mas recien a habri un na Alto Vista. Bremo ta spera cu e ganado por haci bon uzo di e placa. Awo ta di spera ki dia e ganado lo pasa oficina di Lotto den Paardenbaaistraat pa reclama su premio. Esun cu bin cu e ticket cu e numbernan ganado, ta cobr’e. Den pasado ora ta trata di suma grandi asina, sa laga abogado cobra e premio pa nan. Abogado sa pidi entre 10% pa 15% di e suma total, djis pa e bay cobr’e p’e persona ganado.
