Dialuna merdia a conclui a reunion publico caminda a trata e presupuesto di aña 2024. Aki ta caminda cu 12 parlamentario a vota na fabor y 8 contra. Entre e diesdosnan, parlamentario independiente, mr. dr. Ryçond Santos do Nascimento a vota na fabor hunto cu e parlamentarionan di MEP y RAIZ. No ta algo cu ta sosode normalmente, caminda un parlamentario di oposicion ta sostene gobierno. A combersa cu do Nascimento p’asina ricibi su reaccion riba e punto aki.
Ora cu mira e structura di Reino, por confirma cu e ta colonial, segun e parlamentario. El a sigui conta cu ora sala caba di dicid algo e ta sigui pa gobernador di Aruba y djey ta sigui pa gobierno di Reino y na final pa Rey Willem Alexander y algun minister Hulandes. Pues, parlamentanto no ta riba mesun nivel cu Tweede Kamer.
E partidonan grandi ta domina e aparato gubernamental, ta fix nan hendenan eyden despues di campaña. E ta kere ta den supervision financiero, pero no pa semper. Un supervision financiero temporal ta necesario pa cura di e mal maneho financiero di e partidonan grandi. P’esey el a apoya supervision financiero pero temporal. E ta mira cu e presion ta yuda pa cambia politica na Aruba.
Den pasado a mira do Nascimento vota na fabor pa un mocion pa baha Prome Minister, mr. Evelyn Wever-Croes di su funcion como minister-president. E realidad ta cu ta mira nepotismo den e partidonan na mando.
Tin forma pa restructura e pais. For di e pueblo votado, prensa y comportacion di tur. E mesun pueblo ta yuda pa corumpi e sistema. E mentalidad di e pais por bay den e mal direccion y ta momento pa cambia esey.
