E problema di adictonan riba caya ta algo cu ta duna hopi dolor di cabes. Varios organisacion ta traha cu e adictonan. Y un di e organisacionnan aki ta Adopt an Addict.
Audrey Croes-Lacle, Presidente di Adopt an Addict, un fundacion cu ta draai riba donacion, a indica cu nan a traha hopi cu e adictonan cu nan a ‘piki’ for di caya. Tabata door di e molester cu e adictonan aki tabata causa, cu a bin cu e fundacion Adopt an Addict, diescinco aña pasa.
COMIENSO
Den comienso di e trayecto di Adopt an Addict, nan a cuminsa completamente priva. No a pidi Gobierno pa yudansa, pero a bati na porta di comercio y nan a yuda e fundacion e prome dos añanan, unda c’un empresa tabata adopta un adicto. Tur placa cu nan recolecta for di e empresanan, nan tabata manda un suma mensual pa Hogares Crea. For di Hogares Crea nan a yega na un bon acuerdo, unda cu tur luna nan tabata manda placa pa paga pa e rehabilitacion di e adictonan na Santo Domingo. Nan no tabata paga den un solo paga, pero tabata paga un suma mensual.
Na dado momento, na 2010, nan tabata tin 97 adicto na Hogares Crea, na Santo Domingo, cu awo tin 49 aña di existencia. Hogares Crea a cuminsa na Puerto Rico y despues nan a habri sucursal na Santo Domingo, Republica Dominicana.
Den nan 15 aña di existencia nan a haya ayudo di Departamento di Asuntonan Social y di otro instancianan, como tambe hopi donacion. Na 2010, a celebra Dia di Himno y Bandera cu e adictonan na Santo Domingo y tambe a bay cu dos trahado social cu kier a haci un intake di cuanto hende Aruba tabata tin eynan y con nan por yuda den e programa.
E situacion financiero post-COVID na Aruba ta hopi dificil, pa cual e ayudo di comercio no ta bay mas manera antes, pa cual nan ta den un situacion financiero precario. Y nan mester di fondo pa por sigui yuda mas adicto. Pa esaki nan lo tene un recuadacion di fondo, door di un BINGO DRIVE hunto cu BINGO Aruba.
