Despues di su reunion general di miembrecia riba Diaranson 29 di maart 2023 unda a elegi e hunta di directiva di Aruba Trade and Instustry Association (ATIA), durante prome encuentro di e hunta di directiva nobo a elegi e hunta di directiva diario esta e “Daily Board” pa 2023 – 2024.
Mester indica cu e “Daily Board” ta wordo forma pa e siguiente posicion nan: Presidente, Vice Presidente, Tesorero, y Secretario. E hunta a re-elegi Frank Snijders, Gina Habibe y Enrique “Tito” de Cuba como presidente, vice-presidente, y secretario respectivamente. Andrew Harms a wordo elegi como Tesorero. Tambe a elegi e reemplasante nan di e tesorero y secretario kenda nan ta Danilo Werleman y Matthijs Bijen respectivamente.
Director di ATIA ta sumamente contento cu e “Daily Board” cu lo dunele guia den aña 2023 y 2024, sigur un aña yen di reto, entre otro e reformanan indica den e “Landspakket” den area di impuesto y labor cu tin efecto directo y indirecto riba comercio y economia di Aruba. ATIA, awo especialmente, su expertonan ta investigando y studiando ki efecto enberdad e BBO na frontera lo tin pa nos economia. Tambe ATIA lo forma parti di e Dialogo Tripartite Social Laboral, unda hunto cu sindicato y gobierno lo dialoga riba temanan cu tin efecto den areanan social y laboral. Como gremio nos ta advoca pa e ley laboral bira uno mas moderno, agil y “performance based”.
Banda di e retonan ATIA lo organisa diferente evento nan pa miembro y pa publico. Algun di e eventonan pa aña 2023 ta diferente business mixers, varios workshops y tambe Aruba e Networking event mas grandi cu ta ATIA su Corporate event Annual. ATIA ta suplica pa sigui nan riba nan rednan social pa tur informacion.
