Cas di Cultura tabata completamente yen diabierna anochi p’asina celebra e 30 añanan den farandula di Janiro AtaNiro Eisden. E show a bay den un forma espectacular. Pa mayoria di esunnan presente, e concierto a recorda momentonan special y crucial den nan bida. Cada cancion, durante tres decada, a spierta memorianan inolvidabel.
Eisden a describi e 30 añanan den farandula aki como “perseverancia y kere den bo mes.”. El a continua bisando cu ta importante pa yuda otro pa asina bo haya bo bendicion bek. No laga ningun hende core bo careda pa bo, cor’e bo mes. Tambe e ta bisa cu si bo no logra awe, bo lo logra mañan pues pone tur cos den man di Dios.
Tin biaha nos kier hopi cos, pero tin cos cu nos merece. E cantante ta prefera pa prome haya e cosnan cu e merece, pa despues haya locual cu e ta desea.
RECONOCEMENTO
E tabata un evento cu Departamento di Cultura a organisa, algo grandi. Ademas di a mira esaki como un celebracion , Ataniro ta mir’e como un logro. E motibo cu e ta mir’e como un logro ta pasobra tempo cu el a cuminsa, na aña 1991, ningun hende por a imagina cu rap na Papiamento lo a bira un parti di nos cultura. Eisden mes nunca a imagina esaki.
E ta enfatisa cu ta importante pa traha duro, keda consistente, ta un pionero y keda autentico. E mes ta menciona cu otronan cu a uza “su ingredientenan” pa ta exitoso y laga e Papiamento zona, a bira grandi. Esaki p’e ta algo di aplaudi y sigui pusha.
E ingredientenan aki ta algo cu el a bin cu ne y no ta describi esaki como “copia” sino mas bien e ta hacie feliz ora e tende den otro musica. E ta contento.
AGRADECIDO
Ataniro no tin palabra pa describi su gradicimento. E mensahe cu e por duna pa tur cu sigui den e genero cu e ta awo, ta pa keda autentico. Mester corda si cu na momento cu bo ta autentico, e caminda lo ta dificil pero ora cu bo logra e lo logro lo ta real. Eisden ta sinti cu su autenticidad den loke e ta haci a captura e oido di Departamento di Cultura. E ta contento cu a honr’e na bida.
SUAVE
Suave ta e himno di e genero Urbano na Papiamento. Hopi a bin y bay pero Suave ta keda e himno.
Janiro Eisden a finalisa bisando cu “Bo por cambia kico cu bo kier, pero historia bo no por cambia.”
