E no ta un secreto cu fin di aña semper polis sa ta basta ocupa cu accidente. Tur cos ta mustra cu e aña aki no ta un excepcion. Tabata alrededor di 11:00 pm cu a sosode un accidente riba Watty Vos Boulevard.
Aki ta caminda cu un auto marca Suzuki modelo Swift color shinishi, numera A-7205 pa un motibo of otro a perde control y bolter. Tabatin dos persona den auto; e chauffeur cu su pasahero. Ambos a resulta herida, pa cual ambulance a hiba tur dos pa hospital pa atencion medico mas avansa.
Polis a cera rotonde Paperclip p’asina nan por atende cu e accidente trankilamente. Un total di dos unidad di ambulance a presenta pa por atende cu e victimanan. Polis di trafico a tuma declaracion for di e testigonan, cu lo yuda den e proceso investigativo. E motibo exacto di e accidente, ta keda den man di e specialista di trafico di Cuerpo Policial pa saca afo.
Un cos si; ta mustra cu velocidad halto lo a hunga un rol grandi den e accidente aki. Ta pidi tur hende pa bay pocopoco den e dianan nos dilanti.
