E nomber Erick Minguel Schneiders no ta desconoci den mundo di husticia. Diabierna awo e lo ta un biaha mas dilanti mesa berde pa responsabilisa su mes pa otro acto castigabel.
Schneiders na e momentonan aki ta sintando un castigo basta pisa pa un caso di asesinato. Na momento cu e tabata den KIA a tuma luga otro incidente, pa cual hecho e ta dilanti mesa berde diabierna awo. Pero esey no ta tur, pasobra na momento cu e tabata deteni na warda di polis na Santa Cruz, el a logra huy y a keda practicamente tres (3) luna como fugitivo prome cu nan a detene den luna di october na Urataca.
E caso pa cual e ta bini dilanti mesa berde un biaha mas ta intento di asesinato cometi riba e preso Jason Mathilda. Pa motibonan no mucho cla, e preso Mathilda a wordo ataca y agredi den KIA y a ricibi algun hinca pa cual el a keda algun tempo interna den hospital. Mathilda na februari, 2010 a haya un castigo di 8 aña pa asesinato cometi (na 2009) riba Gilbert Regales. Durante of despues di un discusion el a hinca Regales na su garganta cu consecuencianan fatal. E tabatin apenas algun luna afo, ora cu un biaha mas el a keda deteni bou sospecho di a comete un atraco arma riba un empleado di un pompstation, hunto cu dos otro persona, pa cual el a haya un castigo di 5 aña na december, 2019.
Schneiders di su banda ta sintando un castigo di 12 aña, cu el a haya dia 9 di februari, 2017 pa asesinato di Ralph Palm, kende el a tira dia 21 di mei, 2017 dilanti Olde Molen.
E otro acusadonan den e caso di intento di asesinato den KIA ta Stephan Claudio Martina y Luis David Florez Mejia. E ultimo aki tabata envolvi hunto cu Chendrik Maduro den e caso unda cu a tira riba e hoben RC dia 21 di september, 2018. Fiscal a pidi 8 aña y Corte a duna condena di 8 aña pa intento di asesinato.
Tratamento di e caso aki ta programa pa dia 7 di februari pa 8.30 di mainta, pues e prome caso riba rol.
