Dia 26 di november, Arusur a celebra independencia di Surinam cu un dia sumamente deportivo na veld SV Santa Fe, na Meiveld. Tabatin un bar y cushina bon surti cu plato tipico di Surinam y nan famoso BBQ.
For di mainta 11:30 e publico por a disfruta di diferente wega di futbol y alabes probecha di e bar y cushina bon surti cu e platonan di Surinam y naturalmente nan famoso futbol.
Miguel Sabajo, presidente di e club, a comenta cu tin masha hopi aña biba na Aruba y semper el a forma parti di e club Surinam.
El a conta cu e club cu e ta forma parti di dje antes e tabata Phoenix y despues el a bira Arusur. El a sigui splica cu aworaki nan a traha un club Surinam nobo, pasobra no solamente e ta consisti di Surinam, sino tambe tin miembro di otro pais manera di Colombia, Venezuela, sin lubida e Arubiano y e Hulandesnan cu ta forma parti di e club. Ta henter un mescla.
Despues cu nan presidente a fayece, a dicidi pa yama un reunion general p’asina scoge un presidente nobo y forma un directiva nobo.
Cu e directiva nobo aki, a bin cu idea nobo. Ta purba mas tanto posibel celebra e diferente dianan di fiesta den e club y recauda fondo pa e club y tambe pa tur hende bin hunto, pasobra esey ta e meta. E no ta solamente un club di futbol, pero tambe ta un club social.
Di un otro banda nan tin pensa den futuro pa habri un Kid’s Corner cu un Playstation pa e muchanan por bin. Ta bezig via diferente fundacion, como tambe cu e Minister Deporte y Cultura. E minister a bin mira e situacion y a priminti cu e tambe lo bay haci algo p’e club via di e fundacion.
Sabajo a comenta cu nan tabatin un recaudacion di fondo caba, esey tabata den luna di juli, caminda cu nan a celebra Keti Koti riba dia prome di juli, celebracion di abolicion di sclavitud na Surinam. Esaki a bay hopi bon y a recauda basta placa. A dicidi e ora pa haci esaki un biaha mas, pero cu torneo di futbol veterano, caminda cu tabatin cuater wega.
Durante e dia aki, nan tabatin un skina unda cu a bende diferente cuminda, di India, fo’i Java sin lubida e BBQ mes di e club. A purba di varia e bendemento di cuminda cu mas opcion p’e publico. Sin lubida e bar tambe a genera placa pa por yuda mantene e luga.
Sin finansa e club no por sigui dilanti.
