Den un reunion yen di turbulencia a tuma luga eleccion pa algun miembro nobo den directiva di Arubaanse Voetbal Bond (AVB). A yama eleccion pa scoge cuatro miembro nobo.
E miembronan cu nan termino a finalisa tabata Francisco “Frans” Dijkhoff, Rosmin Croes, Mildred Wever y Albert Lake Jr. E ultimo aki tabata e unico cu no a postula pa un otro termino.
Di otro banda, tin un grupo nobo cu a postula pa drenta directiva y kendenan tabata: Curt Thomas, Ashwin Laaf y e bloke di cuater cu ta Devin de Veer, Jomar Boekhoudt, Gilmar Croes y Raymbert Bikker, Pues en total tabatin 9 persona cu a postula nan mes pa e cuatro puestonan cu tabata disponibel.
Tin 21 team miembro y cada team tin derecho riba dos voto.
Di e candidatonan esnan cu a haya voto pa bira e miembronan nobo den e directiva, tres ta nobo y e otro tabata miembro caba. Nan ta: Jomar Boekhoudt (30); Devin de Veer (26); Raymbert Bikker (24) y Milbert Wever (21).
Esaki ta nifica cu e directiva di AVB awo ta consisti di basta sanger nobo y lo por mira cambio cu e clubnan ta desea.
Aunke mester bisa cu prome cu e eleccion a surgi diferencia di opinion pa motibo cu a trece cambionan cu kier haci sin cu a permiti e representante discuti esaki cu nan miembresia.
Un di e preocupacionnan tabata punto di agenda no. 4, caminda cu ta eligi 3 miembro pa 4 aña y 1 miembro pa un aña.
E grupo di 4 tabata haya cu esaki no por ya cu tur decision mester wordo discuti internamente den nan organisacion prome, despues di haya un splicacion pakico di e cambionan cu kier introduci. Na final, a pasa e cambionan toch.
AVB si presidente ta Randolf Lacle.
Tocante Arubaanse Voetbal Bond (AVB)
A funda Arubaanse Voetbal Bond (AVB) na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur nos isla, incluyendo e muchanan, hoben, hende muhe y adultonan. Nan ta responsabel pa sanciona e torneonan di futbol organisa pa mayoria liga. E oficina di AVB ta situa den Compleho Deportivo Frans Figaroa na Noord. Randolf Lacle ta presidente, eligi pa mayoria club miembro di AVB.