Fakkeloptocht of Parada di Flambeu semper tabata masha popular na Aruba y tin un lugar den nos historia di carnaval. Den añanan 40 pa 50 di siglo pasa pa e celebracion di Aña di La Reina, militarnan y polisnan Hulandes na Aruba tabata marcha den cayanan di Aruba cu nan flambeu. Mas despues gruponan di verkennerij y padvinder tabata organisa nan marcha di flambeu den diferente bario na Aruba.
Den e temporada cu wandelmars tabata masha popular na Aruba, gruponan social y di amigo tabata haci nan paseo anochi cu nan flambeu. E tempo ey tabata uza palo seco cu ta haya for di e parti paden di Cadushi of Breba y ta lora un paña na e parti ariba di e palo y hunta un tiki kerosin riba dje y ta cend’e na candela.
E prome “Fakkeloptocht“ den ambiente di carnaval di Aruba Tivoli Club a tuma luga na aña 1967. Por bisa cu e parada aki a sali for di cas di Ru Arends den Adriaan Lacle Boulevard direccion di Club di Tivoli den Wilhelminastraat. E tempo ey a fia “Fakkel“ di Mariniers Kazerne pa uza den e parada. E parada tabata acompaña pa un steelband. Diferente hende tabata cana cu “fakkel“ den nan man.
Segun e añanan ta pasa e popularidad di “Fakkeloptocht” a crece y mas hende tabata participa. E tempo ey ainda tabatin un solo tema pa e parada. E ruta tambe a conoce cambio. Un tempo a cuminsa e parada ariba e “parking lot” dilanti Hotel Central, unda un tempo tabata organisa Watapana Festival. E parada tabata move direccion Hendrikstraat, pasa den verboden den Hendrikstraat y bira robes na Spritzer & Furhman y drenta Nassaustraat (Caya Betico Croes) y sigui te na d skina di Nicky Habibe bira na man drechi drenta Columbustraat y despues bira atrobe robes den Wilhelminastraat direccion Aruba Tivoli Club.
Segun añanan ta pasa a uza e ruta di school MTS Cersare Terzano (awor Colegio EPI) drenta Wilhelminastraat direccion Aruba Tivoli Club. Mientras cu e popularidad di e parada a crece, a opta pa amplia e ruta y tabata sali for di MTS Cersare Terzano direccion Vondellaan, LG Smith Boulevard caba na DOW.
E ruta di parada mas actual ta esun di Avenida Milio Croes, Vondellaan, L.G. Smith Boulevard y caba na e edificio unda antes tabata DOW. Tabata sigur un of dos aña cu a cuminsa cu e parada for di DOW direccion Veld di Cricket den Vondellaan.
E Parada di Flambeu tambe a desaroya su mes. E interes bao di e miembronan di Aruba Tivoli Club a disminui completamente y te na ultimo algun miembro di Aruba Tivoli Club ainda tabata organisa e parada. Esaki tambe a termina y e tempo ey SAC a adopta e parada.
Na e momento aki SMAC ta organisa e parada. Awendia e parada no tin un tema specifico, pues ta completamente habri pa tur grupo y tur hende. Loke a cuminsa antes como un parada cu un of mas steelband, brassband, sound system (Eddie Tec) ta awe un parada cu banda grandi.
Loke ta e “Fakkel” mes, esaki a disminui completo. Sporadicamente por topa cu un fakkel den e parada. E kostuum mes ta T-shirt tur decora, cu algun luz rba dje. Aruba Tivoli Club mes no ta existi mas.
Compila pa Roberto Croes di
“Nos Historia Nos Herencia”.
