Awe un total di ocho empleado di Cuerpo Especial Arubano (CEA) a huramenta como polis extraordinario dilanti Minister di Husticia y Asuntonan Social, Rocco Tjon. Ta trata di cinco empleado cu ta traha den e seccion di transporte di detenidonan na CEA y tres cu ta traha den e ekipo special di K9 cu ta cuida KIA. Como Bijzonder Opsporingsambtenaar (BOA), awor e empleadonan publico aki por traha un proces-verbaal y por carga arma tambe den ehecucion di nan funcion.
E departamento a crece hopi ultimo añanan y ta brinda servicio special na varios entidad hudicial. Asina nan tin un rol esencial den siguridad di Corte di Husticia, ta yuda den transporte di detenidonan pa Cuerpo Policial, Landsrecherche, KMAR, Recherchesamenwerkingsteam (RST) y mas. Nan ta encarga tambe cu transporte di presonan di KIA pa Corte. Pa polis, specialmente ora cu tin accionnan grandi of ora di eventonan di multitud, semper ta conta riba CEA pa transporte e detenidonan. Claro, e personal cu ta haci e trabou ey tambe mester tin autoridad pa actua si ta necesario.
Pa por a haya e poder como un polis extraordinario, e empleadonan mester a sigui un curso di mas of menos shete luna largo na Scol pa Polis. E curso a dura un poco mas largo cu normal debi na pandema y e medidanan cu mester a tuma di distanciamento social, etc. Awor nan a keda completamente cla y por a huramenta dilanti Minister di Husticia Rocco Tjon y director di CEA, Ronny Geerman. A entrega cada un nan decreto gubernamental cu ta regla nan posicion huridico y autoridad pa actua.
E ocho polisnan extraordinario ta di fam Luidens, Wernet y de Cuba pa e seccion di K9 na KIA. Anto pa e seccion di transporte di detenidonan ta G. Sherwood, G. Tromp, G. Martis, R. Orman y R. Ras. Pabien na e ocho polisnan extraordinario nobo, cla pa sigui sirbi y proteha nos comunidad.
A funda Beveiligings Groep Aruba (Blue Team) dia 15 di maart 1997 y cu tempo, a cambia nomber y finalmente na aña 2003 a keda cla cu e departamento nobo, Cuerpo Especial Arubano. Meta di e departamento ta pa cuida edificionan di Gobierno, mandatarionan, brinda siguridad na KIA y transporte di presonan di prizon y wardanan di polis. Desde e tempo ey nan ta encarga cu cuida e parti exterior di KIA, mientras cu e ciudadonan di preso ta atende cu e presonan paden.
